Австралийн алдарт ах дүү дуучдын хослол болох Angus & Julia Stone өөрсдийн шинэ бүтээл болох "Karaoke Bar" нэртэй шинэ цомгоо сонсогчдын хүртээл болголоо. Энэхүү цомог нь тэдний зургаа дахь студийн цомог болох *Cape Forestier*-ийг дэмжих зорилгоор 2024 онд эхлүүлсэн "Living Room Sessions" аялан тоглолтын үеэр бичигдсэнээрээ онцлог юм.
Уран бүтээлчид аялан тоглолтынхоо үеэр Лондон хотын Royal Albert Hall, Парисын L’Olympia, Нью-Йоркийн Town Hall болон Сиднейн Дуурийн театр зэрэг дэлхийн нэр хүндтэй тайзуудад тоглолтоо хүргэсэн байна. Тэд тоглолтуудынхаа завсраар студи орж, дуунуудаа зохион бичүүлдэг байжээ. Жулиа Стоун энэ талаар хуваалцахдаа хамтдаа хөгжим бүтээх нь тэдэнд маш их баяр баясал, амар амгаланг авчирч байсныг дурдсан юм.
Дэлхийг тойрсон аяллын дурсамжууд
Нийт 10 дуутай тус цомгийг Грек, Франц болон тэдний эх орон болох Австралид бичүүлсэн байна. Тухайлбал, Грекийн Гидра арал дээрх хуучин Carpet Factory студид ажилласан нь тэдэнд цаг хугацаагаар аялсан мэт мэдрэмж төрүүлснийг Жулиа онцолжээ. Түүнчлэн уг газар нь тэдний хүндэлдэг уран бүтээлч Леонард Коэний олон дуугаа зохиосон газартай ойрхон байсан аж.
Мөн Францын өмнөд хэсэгт орших Château de Miraval-ийн Miraval студид цомгийн хоёр дахь дуу болох "Monroe" бүтсэн байна. Цомгийн ихэнх дуунуудыг тэд аялан тоглолтын үеэр биедээ авч явсан зөөврийн төхөөрөмжүүдийн тусламжтайгаар бичжээ. Тухайлбал, цомгийн төгсгөлийн бүтээл болох "Mexico City" дуу нь 2024 оны долоодугаар сард Мехико хотод анх удаа хийсэн тоглолтоос нь сэдэвлэн төрсөн байна.
