АНУ-ын гимнастикийн шигшээ багийн тамирчин, Стэнфордын төгсөгч Райли Лоос бэртлийн улмаас АНУ-ын гимнастикийн аварга шалгаруулах тэмцээнийг өнжихөөр болжээ. Тэрээр Панамерикийн аварга шалгаруулах тэмцээний үеэр өвдгөндөө бэртэл авсан бөгөөд дараа нь олон төрөлтийн тэмцээнд эргэн ирэх үедээ мөрөө дахин гэмтээсэн байна. АНУ-ын Гимнастикийн холбооноос түүнийг тэмцээнийг өнжих болсон тухай наймдугаар сарын 5-ны өдөр албан ёсоор зарлажээ.
Үүний дараа Лоос өөрийн Инстаграм хуудсаараа дамжуулан шийдвэрийнхээ талаар хуваалцсан байна. Тэрээр Финикс хотод болох тэмцээнийг өнжих болсондоо маш их харамсаж байгаа ч мөрний хагалгааны дараа энэ жил гаргасан амжилтаараа бахархаж байгаагаа илэрхийлжээ. Түүнийг ийнхүү хүнд шийдвэр гаргасны дараа гимнастикийн спортын нөхдүүд нь болох Иан Гантер, Донелл Уиттенбург, Жастин А Чоу нар сэтгэлийн дэм хайрлаж, илүү хүчтэй эргэн ирнэ гэдэгт итгэж байгаагаа сэтгэгдлээр дамжуулан илэрхийлсэн байна.
Райли Лоос өмнө нь ч мөн ижил төстэй хүнд сорилтуудтай тулгарч байжээ. Өнгөрсөн жил нурууны бэртлийн улмаас олимпын сорилго тэмцээнийг өнжиж, улмаар Парис хотыг зорих олимпын багт багтах боломжгүй болж байв. Энэхүү хүнд цохилтын дараа тэрээр спортоо орхих талаар ч бодож байсан бөгөөд хоёр сарын турш завсарлага авчээ. Гэвч тэрээр Gold Over America Tour-д оролцсоноор гимнастикийн спортыг өөр өнцгөөс харж, дарамт шахалтгүйгээр дахин хичээллэх урам зориг авсан байна.
Эргэн ирснийхээ дараа тэрээр Winter Cup тэмцээнд оролцож, насанд хүрэгчдийн ангилалд анхны олон төрөлтийн аварга цолыг хүртсэн төдийгүй чөлөөт хөдөлгөөн болон цагирагтай дасгалын төрөлд тэргүүлж чадсан юм. Лоос хэлэхдээ, тэрээр зөвхөн үр дүнгийн төлөө бус, харин энэ спортын үйл явц, хөдөлмөр зүтгэл, хамт олондоо хайртай учраас гимнастикаар хичээллэдэг хэмээн хуваалцжээ.
