Пүрэв гарагт болсон бейсболын тоглолтын үеэр Жаред Янг бөмбөгний араас гүйх явцдаа Нолан Маклиний өвдөгтэй толгойгоороо хүчтэй мөргөлджээ. Хүчтэй цохилтын улмаас Янг хэсэг зуур ухаан алдан, талбай дээр хэдэн минутын турш хөдөлгөөнгүй хэвтсэн байна. Энэ үед “Phillies” баг зургаа дахь иннингт 1-0 харьцаагаар тэргүүлж байсан бөгөөд “Citi Field” цэнгэлдэх хүрээлэн нам гүм болсон юм.
Эмнэлгийн ажилтнууд түүний хүзүүг бэхэлж, ойролцоох эмнэлэг рүү хүргэхээр дамнуурга дээр өргөн тэрэг рүү ачих гэж оролджээ. Янг талбайгаас хүргэгдэх үедээ үзэгчид рүү эрхий хуруугаа гозойлгон дохио өгсөн байна.
Гэвч түүнийг зөөвөрлөж буй бичлэг олон нийтийн сүлжээнд тархсаны дараа эмнэлгийн ажилтнуудын ур чадварт эргэлзэх асуудал үүслээ. Ажилтнууд гар дамнуургатай ноцолдож, тэрэг рүү ачих үед дамнуурга ганхаж, Янгийн хүзүү огцом хөдөлсөн нь харагдсан байна. Ялангуяа дамнуурганы түгжээ болон тохируулга гацах үед түргэн тусламжийн ажилтан түүнийг ажиллагаатай болгохын тулд дамнуургыг хүчтэй сэгсэрсэн нь хүзүүний бэхэлгээний зориулалтыг үгүй хийж, толгой болон хүзүүг нь савлахад хүргэжээ.
Хүзүү, нуруу эсвэл тархины гэмтэл авсан байж болзошгүй өвчтөнийг ийнхүү сэгсрэх нь гэмтлийг улам даамжруулах эрсдэлтэй байдаг байна. Америкийн хөтлөгч Оуэн Шройер уг явдлыг шүүмжилж, “Энэ үйл явцад оролцсон бүх хүнийг халах хэрэгтэй, магадгүй гэмт хэрэг үйлдсэн эсэхийг нь шалгах ёстой. Ийм хариуцлагагүй байдал нь мэргэжлийн алдааны түвшинд хүрч байна” хэмээн X сүлжээгээр дамжуулан мэдэгджээ.
Азаар “Mets” багийн түр дасгалжуулагч Энди Гриний хэлснээр Жаред Янг хамгийн аймшигтай үр дагавраас зайлсхийж чадсан бөгөөд түүний компьютерт томографийн (CT) шинжилгээний хариу зүгээр гарсан гэж мэдээлсэн байна.
