АНУ-ын хууль тогтоох байгууллагад хэлэлцэгдэж буй крипто валютын зохицуулалтын "Clarity Act" хуулийн төсөл батлагдах магадлал багассанаар Биткоины үнэ дахин буурлаа. Сүүлийн 24 цагийн хугацаанд Биткоины ханш 2 хувиар унаж, 63,634 ам.доллар орчимд арилжаалагдаж байна. Нэгэн үе ханш 62,784 ам.доллар хүртэл доошилсон байна.
Хуулийн төслийн эргэн тойронд
Polymarket крипто бооцооны платформ дээрх ажиглагчдын үзэж байгаагаар, уг хууль энэ онд батлагдах магадлалыг дөнгөж 35 хувь гэж үнэлж байна. Fidelity болон Goldman Sachs зэрэг санхүүгийн томоохон байгууллагууд уг хуулийг дэмжиж байгаа ч Ардчилсан намын зарим гишүүд хуулийн төслийн одоогийн хувилбарт сэтгэл ханамжгүй байгаа юм.
Тус хууль нь өнгөрсөн жил Төлөөлөгчдийн танхимаар хоёр намын дэмжлэгтэйгээр батлагдсан ч 2026 онд гацсан байдалтай байна. Үүнд банкны салбарынхан тогтвортой валютын (stablecoin) өгөөжийн талаар санаа зовниж буй нь нөлөөлсөн байна. Банкны лоббичдын үзэж буйгаар, хэрэв крипто биржүүд хэрэглэгчдэд өндөр өгөөж амлавал арилжааны банкнуудын хадгаламжийн сан буурах эрсдэлтэй гэж үзжээ. Мөн Ардчилсан намынхны зүгээс ёс зүйн асуудлаар шүүмжлэлтэй хандаж ирсэн.
Хууль тогтоогчдын хүлээлт
Өнгөрсөн долоо хоногт ёс зүйн асуудлыг тусгасан хуулийн шинэчилсэн хувилбарыг танилцуулсан бөгөөд үүнд төрийн албан хаагчид болон тэдний гэр бүлийнхэн крипто валют гаргах, сурталчлахыг хориглосон заалт оржээ. Бүгд найрамдах намынхан энэ долоо хоногт хуулийн төслийг урагшлуулахын тулд хоёр намын дэмжлэгийг авахаар зорьж байна. Конгресс наймдугаар сарын амралтаа эхлэхээс өмнө уг хуулийг батлахыг олон хууль тогтоогч хүсэж байгаа юм. Хэрэв батлагдвал энэ нь крипто зах зээлд тодорхой зохицуулалтын хүрээг бий болгох юм.
