Венесуэлд төвтэй, Латин Америк даяар үйл ажиллагаа явуулдаг “Tren de Aragua” гэмт хэргийн бүлэглэлийн толгойлогч АНУ-ын цэргийн цохилтын улмаас амиа алдсаныг АНУ-ын Ерөнхийлөгч Дональд Трамп албан ёсоор мэдэгдлээ. Энэхүү бүлэглэл нь хүн худалдаалах, хар тамхины наймаа болон хүчирхийллийн бусад ноцтой гэмт хэргүүдээрээ зартай бөгөөд Вашингтон тэднийг олон улсын аюулгүй байдалд заналхийлсэн террорист байгууллага хэмээн зарлаад байсан юм.
АНУ-ын зүгээс уг бүлэглэлийн үйл ажиллагааг хязгаарлах, тэдний удирдагчдыг олж устгах чиглэлд сүүлийн саруудад томоохон арга хэмжээнүүдийг авч хэрэгжүүлж байв. “Tren de Aragua” нь зөвхөн Венесуэлд бус, хил дамнасан гэмт хэргийн сүлжээгээрээ дамжуулан АНУ-ын хилийн аюулгүй байдалд ч ноцтой сорилт учруулж байсан гэж үзэж байгаа юм.
Шинжээчдийн үзэж байгаагаар, энэхүү ажиллагаа нь АНУ-ын засаг захиргаа гэмт хэргийн бүлэглэлүүдийн эсрэг явуулж буй хатуу бодлогын нэг хэсэг бөгөөд бүс нутгийн аюулгүй байдлыг хангах зорилготой аж. Одоогоор уг цохилт яг хаана, хэзээ болсон талаарх дэлгэрэнгүй мэдээллийг АНУ-ын Батлан хамгаалах яамнаас нууцалж байгаа хэдий ч энэ нь гэмт хэргийн сүлжээнд томоохон цохилт боллоо гэж олон улсын хэвлэлүүд онцолж байна.
Венесуэлийн тал уг үйл явдалтай холбоотойгоор одоогоор албан ёсны тайлбар хийгээгүй байна. АНУ-ын зүгээс тус бүлэглэлийн үлдсэн удирдагчдыг илрүүлэх, сүлжээг бүрмөсөн устгах ажиллагаа үргэлжилнэ гэдгээ илэрхийлжээ.
