Орчин үеийн госпел (шашны сэдэвтэй хөгжим) урсгалын нөлөө бүхий уран бүтээлч Марвин Сапп өөрийн карьерын дараагийн томоохон алхмыг хийлээ. Тэрээр Roc Nation Distribution платформтой хамтын ажиллагааны гэрээ байгуулснаа албан ёсоор зарласан байна.
Энэхүү хамтын ажиллагаа нь түүний 17 дахь цомог болох 'Restoration'-ыг гаргахын өмнөх чухал үйл явдал болж байна. Энэ нь түүний хувьд амьд тоглолтын бичлэг бүхий ес дэх цомог юм. Уг хэлэлцээрийг TITLE 9 болон Timeless Music Group-ийн Стэнли Браун нар зохион байгуулжээ.
Марвин Сапп өөрийн сэтгэгдлээ хуваалцахдаа, гучин жил гаруй үргэлжилсэн уран бүтээлийн замналд нь хамтрагч талуудын зорилго, алсын хараа нэгдэх нь чухал болохыг онцолсон байна. Тэрээр Roc Nation-ы удирдлагын багтай хамтран ажиллахдаа таатай байгаагаа илэрхийлжээ.
Шинэ цомгийн анхны сингл "He’s Not Finished" дуу наймдугаар сарын 21-нд сонсогчдын хүртээл болох бөгөөд одоогоор урьдчилсан захиалга авч эхэлсэн байна. Уг дууг Сапп болон Стэн Жонс нар хамтран бичжээ. 'Restoration' цомог нь 2026 оны намар гарахаар төлөвлөгдөж байгаа бөгөөд тодорхой өдөр нь хараахан товлогдоогүй байна.
Roc Nation Distribution-ийн ерөнхийлөгч Кристиан Сантини энэхүү хамтын ажиллагаанд сэтгэл хангалуун байгаагаа илэрхийлж, Марвин Сапп бол олон үеийн туршид нөлөөгөө хадгалж ирсэн авьяаслаг уран бүтээлч гэдгийг онцолжээ. Энэхүү түншлэл нь Roc Nation-ы хувьд госпел хөгжмийн салбарт байр сууриа бэхжүүлэхэд чиглэсэн томоохон алхам болж байна.
