Америкийн хөлбөмбөгийн (NFL) алдарт Даллас Ковбойс багийн эзэн Жерри Жонс энэ завсрын сонгуулийн мөчлөгт улс төрийн зорилгоор нийт 1.56 сая орчим ам.долларын хандив өгснийг Холбооны сонгуулийн хорооны (FEC) мэдээлэлд үндэслэн Front Office Sports мэдээллээ. Багийнх нь улирлын эхлэл тааруу байгаа энэ үед түүний талбайн гадуурх санхүүгийн шийдвэрүүд олны анхаарлыг татаж байна.
Front Office Sports-ийн мэдээлснээр, Бүгд найрамдах намыг олон жил дэмжиж ирсэн Жерри Жонсын хандивын дийлэнх нь тус намтай холбоотой улс төрийн үйл ажиллагаанд зарцуулагджээ. Тухайлбал, тэрбээр Дональд Трампын MAGA Inc. хороонд 1 сая ам.доллар, Техас муж дахь сонгуулийн өрсөлдөөнд хагас сая доллар хандивласан байна. Үүний 250,000 доллар нь Ардчилсан намаас нэр дэвшигч Жеймс Таларикотой Сенатын суудлын төлөө өрсөлдөж буй Пакстоныг дэмжигч улс төрийн хороонд (PAC) очжээ. Түүнчлэн түүний хүү бага Жерри Жонс Техасын болон үндэсний хэмжээний сонгуулиудад Бүгд найрамдах намынханд зориулж 300,000 гаруй ам.доллар хандивласан байна.
Forbes сэтгүүлээс хөрөнгийн хэмжээг нь 23.5 тэрбум ам.доллар гэж тооцдог Жонсын хувьд улс төрд мөнгө хандивлах нь шинэ зүйл биш юм. Тэрбээр 2017 онд Трампын тангараг өргөх хороонд 1 сая доллар, харин 2020 онд Бүгд найрамдах намын нэр дэвшигчдэд 396,000 ам.доллар өгч байсныг USA Today мэдээлж байв. Энэ удаагийн завсрын сонгуулиар NFL-ийн багийн эзэд нийтдээ 18 сая гаруй долларын хандив өгснөөс Жонсын өгсөн дүн дөрөвдүгээрт эрэмбэлэгдэж байна.
Жонс зөвхөн улс төрийн сонгуулиар зогсохгүй, саяхан Клинтоны санд 10 сая ам.доллар хандивласныг Forbes мэдээлсэн билээ.
Талбай дээрх нөхцөл байдал
Талбайн гадна их хэмжээний санхүүгийн шилжүүлэг хийгдэж буй ч Жерри Жонсын баг талбай дээр амаргүй сорилттой нүүр тулж байна. Даллас Ковбойс 7 дахь долоо хоногийн дараах байдлаар 3 ялалт, 4 хожигдолтой явж байгаа юм. Тэд хамгийн сүүлд Филадельфи Ийглз багийг 38-21 харьцаагаар хожиж, тааруу цувралаа зогсоосон бөгөөд тус тоглолтод багийн давуулагч Дак Прескотт 212 ярд дамжуулж, гурван тачдаун хийснээр багийн түүхэн дэх ялалтын тоогоор 86-д хүрч, Рожер Стаубахыг давжээ.
