Дэлхийн холимог тулааны урлагийн (MMA) хамгийн том байгууллага болох UFC-ийн гүйцэтгэх захирал Дана Уайт Лас Вегас хотноо болсон Дональд Трампын цуглаанд оролцсон нь олон нийтийн сүлжээнд хүчтэй шүүмжлэлийг өдөөлөө. Уг арга хэмжээний үеэр тэрээр өөрийн залуу насны тухай ярьж, Лас Вегаст үйлчилгээний салбарт ажиллаж байхдаа цайны мөнгөөр амьдралаа залгуулдаг байсан туршлагаа хуваалцсан байна.
Дана Уайт өөрийн яриандаа "Цайны мөнгөнд татвар ногдуулахгүй байх" хөтөлбөрийг дэмжиж байгаагаа илэрхийлж, энэ нь хөдөлмөрч америкчуудын орлогыг хамгаалахад чухал ач холбогдолтой гэж үзжээ. Дональд Трамп ч мөн энэ санааг дэмжиж, үйлчилгээний салбарын ажилтнуудын цайны мөнгөнд тэг хувийн татвар ногдуулах тухай ярьсан байна.
Гэвч энэхүү үйл явдлын дараа UFC-ийн шүтэн бишрэгчид Дана Уайтын яриаг хоёр нүүртэй хэмээн шүүмжилж, гол анхаарлаа тулаанчдын цалингийн асуудал руу хандуулав. Фэнүүд түүнийг "хөдөлмөрийн хөлс бүр чухал" гэж ярьж байгаа хэрнээ өөрийн байгууллагын тулаанчдын цалин хэт бага байгааг онцолжээ.
Тухайлбал, UFC-ийн анхан шатны гэрээгээр тулаанч нь ялалт байгуулбал 24,000 доллар, ялагдвал ердөө 12,000 долларын хөлс авдаг тогтолцоотойг олон нийтийн сүлжээнд сануулж, хошигносон сэтгэгдлүүд ихээр бичигдсэн байна. Дана Уайтын хувьд энэ жил улс төрийн татварын бодлогын асуудлаар Дональд Трамптай холбогдож байсан удаатай. Тухайлбал, тэрээр мөрийтэй тоглоомын алдагдлыг татвараас хасдаг хуулийн заалтыг өөрчлөхийг хүссэн захидал илгээж байсан боловч одоогоор энэ нь шийдэгдээгүй байгаа юм.
