АНУ-ын Ерөнхийлөгч Дональд Трамп болон Үнэт цаас, биржийн хороо (SEC), Таваарын фьючерсийн арилжааны комиссын (CFTC) удирдлагууд ирэх долоо хоногт Цагаан ордонд крипто болон таамаглалын зах зээлийн төлөөллүүдтэй уулзахаар төлөвлөж байна. Энэхүү уулзалт нь крипто салбарын хувьд хамгийн чухалд тооцогдож буй хуулийн төсөл энэ онд батлагдах магадлал эрс буурсан үед тохиож байгаа юм.
Мэдээлэлд дурдсанаар, 8-р сарын 19-нд болох уулзалтад Coinbase, Ripple, Chainlink, Andreessen Horowitz, Kalshi, Paradigm компанийн удирдлагууд болон Digital Chamber-ийн төлөөлөгчид оролцохоор хүлээгдэж байна. Түүнчлэн Kraken, Gemini, Нью-Йоркийн хөрөнгийн бирж (NYSE) болон Nasdaq биржийн төлөөллүүдийг урьсан бөгөөд оролцогчдын эцсийн жагсаалт өөрчлөгдөж болзошгүй байна. CFTC-ийн дарга Майкл Селиг, SEC-ийн дарга Пол Аткинс нар мөн оролцохоор хүлээгдэж буй аж.
CLARITY хуулийн төслийн нөхцөл байдал
Энэхүү уулзалт нь крипто зах зээлийг зохицуулах, SEC болон CFTC-ийн эрх мэдлийн заагийг тогтоох зорилготой Digital Asset Market Clarity Act (CLARITY) хуулийн төслийн Сенатын дараагийн шатны хэлэлцүүлэг эхлэхээс өмнө болж байна.
Polymarket-ийн арилжаачид уг төсөл 2026 онд хууль болж батлагдах магадлалыг 19 хувь гэж үзэж байгаа нь 2-р сарын 19-ний 82 хувийн дээд цэгээс буурсан үзүүлэлт юм. Харин Galaxy Digital энэ онд батлагдах магадлалыг дөнгөж 10 хувь гэж тооцоолжээ.
Хуулийн төслийг Төлөөлөгчдийн танхим өмнө нь баталж, 5-р сарын 14-нд Сенатын Банкны хороо дэмжсэн ч төрийн өндөр албан тушаалтнуудын крипто үйл ажиллагааны хязгаарлалт, стейблкоины урамшуулал зэрэг улс төрийн маргаануудаас болж тохиролцоо гацаанд ороод байна. Ялангуяа Трампын крипто төслүүдтэй холбоотой ёс зүйн маргаан хамгийн том саад болж буйг Galaxy Digital онцолжээ.
Сенат 9-р сарын 14-нд эргэн хуралдах бөгөөд 10-р сарын эхээр сонгуулийн сурталчилгааны ажилдаа гарахаас өмнө хуулийг хэлэлцэх ердөө гурван долоо хоногийн хугацаа үлдэж байна.
