Канадын алдарт реппер Дрейк стример Кай Сенатын зохион байгуулж буй "Streamer University" буюу стримерүүдийн сургалтын нээлтийн үйл ажиллагаанд оролцогчдод гэнэтийн бэлэг барилаа. Долдугаар сарын 15-ны өдөр болсон уг арга хэмжээний үеэр Кай Сенат оролцогчдод хандан репперийн илгээсэн видео мэндчилгээг үзүүлжээ.
Дрейк видео мэндчилгээндээ "2026 онд дахин нэг жилийг угтаж байна. Тэнцсэн бүх шинэ болон туршлагатай бүтээлчүүддээ баяр хүргэе" хэмээн хэлсэн байна. Тэрээр оролцогчдыг энэ боломжийг бүрэн дүүрэн ашиглаж, бие биенээсээ суралцахыг уриалжээ. Мөн тэрээр өөрийн OVO багийн хамт Арканзас мужийн Конвэй хотын Хендрикс коллежид байрлаж буй оролцогчдод зориулан тусгай бэлгүүд бэлдсэнээ дуулгасан юм. Стримерүүд бэлгүүд дотроос одеколон, Nike брэндийн хувцас болон OVO-гийн бараа бүтээгдэхүүнүүдийг хүлээн авчээ.
Энэхүү стриминг сургалт нь хоёр дахь жилдээ зохион байгуулагдаж байгаа бөгөөд өмнөх жил Огайо мужийн Акрон их сургуульд болсон анхны сургалт нь "Streamer Awards"-аас шилдэг стриминг арга хэмжээний шагналыг хүртэж, Twitch платформ дээр 20 сая гаруй цаг үзэгдсэн амжилт үзүүлж байв.
Кай Сенат өнгөрсөн оны зургадугаар сард "Streamer University"-ийн нэр болон оюуны өмчийг бүрэн эзэмшихийн тулд хуулийн арга хэмжээ авсан гэдгээ мэдэгдэж байсан юм. Тэрээр энэ санааг бусдаас хамгаалах, өөрийн болгох нь чухал байсныг онцолж, уг төслийг илүү онцгой болгохын тулд бүрэн эрхтэй байх шаардлагатай байсан хэмээн ярьжээ.
