NBA-гийн талбайн гаднах нэгэн сонирхолтой маргаан саяхан дэгдсэн нь сагсан бөмбөг сонирхогчдын анхаарлыг татаад байна. Алдарт тоглогч Монта Эллис саяхан “Хэрэв намайг болон Стеф Карриг аварга авсан багуудаар нь сольчихвол яг адилхан үр дүн гарах байсан” гэх зоримог мэдэгдлийг хийжээ. Үүний дараа өөр нэгэн тоглогч болох Жефф Тиг уг маргаанд нэгдэж, хэрэв Карриг Дамиан Лиллардаар сольсон ч аварга багуудын үр дүн адилхан байх байсан хэмээн Эллисийн санааг дэмжсэн байна.
Харин энэхүү таамаглалд Голден Стэйт Уорриорс (Golden State Warriors) багийн ахмад зүтгэлтэн Дрэймонд Грийн өөрийн нэвтрүүлгээрээ дамжуулан няцаалт өглөө. Тэрээр аваргын цом хүртэх нь зөвхөн талбай дээрх тоглолтоос хамаардаггүй, харин тоглогчийн манлайлал, хувийн зан чанараас ихээхэн шалтгаалдаг болохыг тайлбарласан юм.
Грийн хэлэхдээ: “Аваргын цомыг ‘Өө, энэ тоглогчийг тийш нь хөдөлгөчихье’ гэж зүгээр нэг тоглогч солих замаар авдаггүй. Үүний цаана маш олон зүйл байдаг. Энэ бол зөвхөн сагсан бөмбөг биш. Тухайн хүний зан чанар, тэр хүн хэрхэн манлайлдаг вэ гэдэг нь чухал. Тухайн тоглогч байгууллагын нүүр царай болоход тэрхүү клуб хэрхэн байр сууриа олж байгаа вэ гэдэг чухал байдаг” хэмээн онцолжээ.
Түүний үзэж байгаагаар Эллис болон Тиг нар аваргын цомын цаадах гүн гүнзгий хүчин зүйлсийг дутуу үнэлж байна. Стеф Карригийн багтаа авчирдаг уур амьсгал, манлайлал нь багийн хэн бэ гэдгийг тодорхойлдог бөгөөд өдөр тутмын зуршил, итгэлцэл дээр аварга баг бүрэлддэг аж. Иймээс тоглогчдыг хооронд нь сольж тавих таамаглал ямар ч утгагүй бөгөөд энэ нь Карригийн манлайлагч чанарыг үгүйсгэж буй хэрэг гэж Грийн үзэж байна.
Хэдийгээр Монта Эллис өөртөө довтолгоо үүсгэх чадвартай байсан ч Карригийн талбай дээрх олон талт тоглолт, хамгаалагчдыг өөртөө татах чадвар нь Клэй Томпсон болон Дрэймонд Грийн нартай төгс зохицож, 4 удаагийн аваргын амжилтыг авчирсан билээ.
Уорриорс багийн ерөнхий менежер асан Боб Майерс 2012 онд Эллисийг Эндрю Богутоор сольж, Карриг багийн гол тоглогч болгох эрсдэлтэй шийдвэр гаргаж байсан юм. Энэ шийдвэр маш зөв алхам болж, Карри хоёр удаа MVP болж, багтайгаа 6 удаа Финалд хүрч, 4 удаа аваргалсан билээ. Магадгүй зэрэгцээ ертөнцөд Эллисийг Карригаар солих нь үр дүнтэй байж болох ч бодит байдал дээр Карри бол Уорриорс багийн зүрх сэтгэл хэвээр байна.
