Дубайд төвтэй, олон улсад алдартай Emirates агаарын тээврийн компани нислэгийн тийзний төлбөрийг биткойн болон бусад крипто валютаар хүлээн авч эхэлснээ зарлалаа. Энэхүү үйлчилгээг Crypto.com крипто биржтэй хамтран хэрэгжүүлж байгаа бөгөөд зорчигчид emirates.com сайт эсвэл тус компанийн гар утасны аппликейшнээр дамжуулан төлбөрөө хийх боломжтой болжээ.
Emirates-ийн дэд ерөнхийлөгч бөгөөд арилжаа хариуцсан захирал Аднан Казим энэхүү алхам нь дижитал орчинд илүү ойр, мөнгө санхүүгээ гар утсаараа дамжуулан удирдаж, аяллаа төлөвлөдөг залуу үеийнхний хэрэгцээ шаардлагад нийцэж байгааг онцолсон байна. Тус компани анх 2022 онд крипто валютаар төлбөр авах төлөвлөгөөтэй байгаагаа мэдэгдэж байсан бол одоо ийнхүү бодит ажил хэрэг болж байна.
Одоогоор уг төлбөрийн сонголт нь зөвхөн Арабын Нэгдсэн Эмират Улсад оршин суудаг, Арабын Нэгдсэн Эмират улсын дирхамаар үнэ нь тогтоогдсон захиалга хийж буй хэрэглэгчдэд нээлттэй байгаа юм. Энэхүү интеграцчилал нь Crypto.com-ийн Дубайд тусгай зөвшөөрөлтэй салбараар дамжин хэрэгжиж байна.
Энэхүү шийдвэр нь Дубайн засгийн газрын "Бэлэн мөнгөгүй нийгэм" (Cashless Strategy) болон D33 эдийн засгийн хөтөлбөртэй уялдан гарчээ. Уг хөтөлбөрийн хүрээнд 2026 оны эцэс гэхэд Дубайн хувийн болон төрийн салбарын гүйлгээний 90 хувийг дижитал хэлбэрт шилжүүлэх зорилт тавиад байгаа юм. Emirates компани нь өмнө нь Дубайн санхүүгийн байгууллагатай дижитал төлбөрийн системийг хөгжүүлэх чиглэлээр хамтран ажиллаж байсан туршлагатай билээ.
