Дуучин Жастин Бибер болон түүний эхнэр Хэйли Бибер нар гэрлэснийхээ 8 жилийн ойг тэмдэглэж байна. Хосууд 9-р сарын 13-ны Ням гарагт хуримын ойгоо угтаж, Жастин өөрийн Instagram хуудсаараа дамжуулан эхнэртээ зориулсан мэндчилгээ нийтэлжээ.
Өдгөө 32 настай дуучин нийтлэлдээ “8 жилээс хязгааргүй рүү ❤️ ШИНЭ ЭХЛЭЛ. Би чамд хайртай хонгор минь, ойн баярын мэнд хүргэе” хэмээн бичсэн байна. Түүний нийтэлсэн зургуудад хосууд бямба гарагт нэгэн орон нутгийн баар шиг харагдах газарт хамтдаа бильярд тоглож байгаа бөгөөд арын зурагтаар Техас, Охайо мужийн хөлбөмбөгийн тоглолт гарч буй нь харагджээ. Харин Rhode брэндийг үүсгэн байгуулагч, 29 настай Хэйли түүний постон дээр сэтгэгдэл үлдээхдээ “Бильярд аймаар муу тоглодог миний 8 жил” хэмээн хошигносон байна. Түүнчлэн тэрээр Instagram Stories-доо хосууд болзооныхоо үеэр үнсэлцэж буй агшныг хуваалцжээ.
Жастин, Хэйли нар хэдэн жилийн турш салж, нийлж болзсоны эцэст 2018 оны 9-р сард Нью-Йорк хотын шүүхийн байранд албан ёсоор гэрлэсэн юм. Жилийн дараа тэд Өмнөд Каролина мужийн Монтаж Палметто Блафф зочид буудалд гэр бүл, найз нөхдийнхөө хүрээнд уламжлалт хуримын ёслол, одод цугласан үдэшлэг зохион байгуулж байв. Улмаар тэд 2024 оны 8-р сард анхны хүүхэд болох Жэк Блюз Бибер нэртэй хүүгээ өлгийдөн авсан билээ.
Сүүлийн долоо хоногуудад хосууд Финнеас болон Клаудиа Сулевски нарын хуриманд зочилсон байна. Тус хурим Калифорни мужийн Монтесито хотын Сан Исидро Ранчид болсон бөгөөд ёслолыг Финнеасын охин дүү, дуучин Билли Айлиш хөтлөн явуулжээ. Жастин уг баярын үеэр авхуулсан байгалийн үзэсгэлэнт уулсын дэвсгэртэй сельфи зургуудаасаа 8-р сарын 30-нд хуваалцаж байв.
