Холливудын нэрт жүжигчин Жонни Депп өөрийн инстаграм хуудсан дахь бүх бичлэгээ устгаж, профайл зургаа шинэчлэн олон нийтийг гайхшрууллаа. Тэрээр 30 орчим сая дагагчтай хуудсаа Чарльз Диккенсийн сонгодог зохиолоос сэдэвлэсэн "Ebenezer: A Christmas Carol" хэмээх шинэ киноны сурталчилгааны талбар болгон хувиргасан байна.
Жүжигчний хуудсанд одоогоор гуравхан зураг үлдсэн бөгөөд тэдгээрийг дарааллуулан харахад "BAH HUM BUG" гэх бичиг гарч ирэх ажээ. Мөн тэрээр өөрийн намтар хэсэгтээ "Скруж болохоосоо өмнө тэр Эбенезер байсан" хэмээн бичиж, дүрээ тодотгосон байна. Энэхүү кинонд Жонни Депп гол дүр болох Эбенезер Скруж-ийн дүрийг бүтээх юм.
Киноны найруулагчаар "Pearl", "MaXXXine" зэрэг бүтээлээрээ танигдсан Ти Уэст ажиллаж байгаа бөгөөд уг түүхийг ер бусын сүнстэй үлгэр хэлбэрээр дүрслэхээр болжээ. Киноны гол дүрд Жонни Деппээс гадна Андреа Райзборо, Иэн Маккеллен, Руперт Гринт, Дэйзи Ридли зэрэг жүжигчид тоглох юм. Киноны зураг авалт болон үйл явдлын хувьд Скруж өөрийн өнгөрсөн, одоо, ирээдүйн сүнснүүдтэй учирч, амьдралаа эргэн харах боломжийг эрэлхийлж буй тухай өгүүлнэ.
Олны танил хүмүүс шинэ төсөл, киноныхоо өмнө цахим сүлжээгээ цэвэрлэх нь түгээмэл үзэгдэл болсон. Өмнө нь Тейлор Свифт, Оливиа Родриго, Блэйк Лайвли нар ижил төстэй аргыг хэрэглэн шүтэн бишрэгчдийнхээ анхаарлыг татаж байв. Жонни Деппийн хувьд энэ нь тун ховор тохиолдол бөгөөд тэрээр өмнө нь идэвхтэй пост оруулдаггүй, профайл зургаа олон жил өөрчлөөгүй байсан юм.
"Ebenezer: A Christmas Carol" кино 11-р сарын 13-нд кино театруудаар нээлтээ хийхээр төлөвлөгдөж байна.
