Холливудын алдартай жүжигчин Минни Драйвер Францад автомашины ноцтой осолд орсон талаараа өөрийн цахим хуудсаараа дамжуулан мэдэгдлээ. Тэрээр осолд орсны дараа хүзүүний бэхэлгээ зүүсэн байдалтайгаар дүрс бичлэг хийж, шүтэн бишрэгчиддээ хандан мэдээлэл өгсөн байна.
Түүний өгүүлснээр, Францад машин барьж явсан үед нь өөр нэгэн тээврийн хэрэгсэл түүнийг хажуу талаас нь мөргөсөн байна. Энэхүү ослын улмаас тэрээр хүзүүний бэхэлгээ зүүхээс өөр аргагүйд хүрчээ. Хэдийгээр осол маш ноцтой болсон ч жүжигчин бүсгүй өөрийгөө амьд үлдсэндээ талархаж байгаагаа илэрхийлсэн байна.
Минни Драйвер нь олон арван кинонд тоглосон, олон улсад танигдсан жүжигчин юм. Тэрээр осолтой холбоотой нэмэлт мэдээлэл өгөөгүй бөгөөд одоогоор биеийн байдал болон ослын талаарх дэлгэрэнгүй нөхцөл байдал тодорхойгүй байна.
