UFC-ийн хагас дунд жингийн аварга Ислам Махачев удахгүй болох тулааныхаа өрсөлдөгч Иэн Гарригийн сүүлийн үеийн хэвлэлд өгсөн ярилцлагуудыг анхааралтай ажиглаж байгаагаа илэрхийллээ. Дагестан гаралтай аварга тамирчин маань Ирландын тулаанч Иэн Гарриг өөрийнх нь төрхөд огт зохихгүй “муу залуу”-гийн дүрд хувирахыг хичээж байна хэмээн үзэж байна.
Махачев MMA Junkie сайтад өгсөн ярилцлагадаа: “Би түүний хэд хэдэн ярилцлагыг үзлээ. Үнэнийг хэлэхэд, тэр ярилцлагадаа маш муу харагдаж байна. Тэр ярилцлага өгөхөөс илүү бэлтгэлдээ анхаарсан нь дээр. Гэрт нь хэн нэгэн түүнийг удирдаж, юу ярихыг нь зааж өгч байгаа мэт санагдлаа. Тулааны долоо хоногт тэр үргэлж муу залуугийн дүр эсгэдэг” хэмээн шүүмжилжээ.
Нөгөө талаас, өөрийгөө “Ирээдүй” хэмээн нэрлэдэг Иэн Гарри тулааны дараа хэлэх үгээ хүртэл аль хэдийн бодож төлөвлөсөн гэдгээ High Performance подкастад ярьсан байна. Тэрээр Махачевыг ялсны дараа хэнтэй тулалдах вэ гэдгээ хүртэл бодож байгаагаа дурджээ. Мөн тэрээр Махачевыг гарны бэртэлтэй гэх мэдээлэлд эргэлзэж буйгаа илэрхийлээд, аваргууд бүсээ хадгалж үлдэхийн тулд тулалдахгүй байхыг илүүд үздэг гэж буруутгасан байна.
Ислам Махачев өрсөлдөгчийнхөө ярианд ач холбогдол өгөхөөс илүүтэйгээр торны дотор юу болохыг чухалчилж байна. Тэрээр Гарригийн цохилтууд тодорхой хэмжээний сорилт болно гэж үзэж байгаа ч, тулаан газарт шилжвэл өрсөлдөгч нь удаан тэсэхгүй гэсэн байр суурьтай байна.
