АНУ-ын Кантри хөгжмийн академи (ACM) өөрийн байгууллагыг удирдах шинэ гүйцэтгэх захирлаар Энди Шуон-ыг томилсноо зарлалаа. Тэрээр өмнө нь кантри хөгжмийн салбарт ажиллаж байгаагүй ч MTV, VH-1, Warner Brothers Records, Universal Music Group, Ticketmaster болон CBS Radio зэрэг томоохон байгууллагуудад удирдах албан тушаал хашиж байсан арвин туршлагатай нэгэн юм.
Энди Шуон нь 2024 оны зургаадугаар сарын 30-нд албан тушаалаасаа буусан Дэймон Уайтсайд-ын халааг авч байна. Дэймон Уайтсайдын хувьд сүүлийн зургаан жилийн турш тус байгууллагыг удирдсан бөгөөд оны эцэс хүртэл хүндэт захирлын үүргийг гүйцэтгэх юм.
Шинэ захирал Энди Шуон өөрийн карьерынхаа туршид шинэ сорилтуудыг хэрхэн даван туулж ирснээ онцолжээ. Тэрээр радиогийн салбараас телевиз, улмаар хөгжмийн студи болон дижитал стриминг үйлчилгээний салбарт амжилттай шилжиж ажиллаж байсан туршлагатай. Тэрээр кантри хөгжим дэлхий дахинд өсөлттэй байгаа энэ үед уран бүтээлчдийг шүтэн бишрэгчидтэй нь холбох, брэнд бүтээн байгуулах, телевизийн контент үйлдвэрлэх зэрэг өөрийн ур чадварыг ашиглан ажиллахаа илэрхийлсэн байна.
Кантри хөгжмийн академийн шагнал гардуулах ёслол нь 2022 оноос эхлэн уламжлалт телевизийн нэвтрүүлгээс татгалзаж, Amazon Prime Video-оор дамжуулан цацагддаг болсон билээ. Энэхүү хамтын ажиллагааны гэрээ нь 2028 он хүртэл үргэлжлэх юм.
