Карибын тэнгисийн хөгжмийн наадмыг зохион байгуулагч Caribbean Elite Group байгууллагаас дөрөв дэх удаагийн наадмыг ирэх 2026 оны 9-р сарын 18-20-ны өдрүүдэд Тринидад ба Тобаго улсад зохион байгуулахаар болсноо зарлалаа. Энэхүү арга хэмжээ нь өмнөх гурван жилийн турш АНУ-ын Брүүклин хотын Kings Theatre-т болж байсан юм.
Наадмын гол үйл ажиллагаа 9-р сарын 19-ний бямба гарагт Порт-оф-Спейн хотын Үндэсний урлагийн академид болох бөгөөд энэ жил нэг өдрийн баярыг илүү өргөжүүлж, "Caribbean Music Awards Elite Weekend Experience" нэртэй олон талт үйл явдлыг зохион байгуулахаар төлөвлөжээ. Хөтөлбөрт хөгжим, соёлын арга хэмжээнүүд, шагнал гардуулах ёслол, албан ёсны үдэшлэг болон ган төмөр хөгжмийн (steelpan) үзүүлбэрүүд багтах юм.
Энэ удаагийн наадмыг Тринидадын сока хөгжмийн од Nailah Blackman болон "Карибын инээдмийн хаан" хэмээх Majah Hype нар хөтлөн явуулна. Majah Hype нь дөрөв дэх жилдээ дараалан хөтлөгчөөр ажиллаж байна.
Наадмын нэр дэвшигчдийн хувьд Тринидад ба Тобагогийн уран бүтээлч Lady Lava нийт долоон төрөлд есөн удаа нэр дэвшиж тэргүүлж байгаа бол Machel Montano, V’ghn, Ayetian нар тус бүр долоон төрөлд нэр дэвшээд байна. Мөн Vybz Kartel, Tyla, Nicki Minaj, Bad Bunny, Shakira, Sting, Fridayy, Davido, Burna Boy зэрэг алдартай уран бүтээлчид нэр дэвшигчдийн жагсаалтад багтжээ.
Нийт 40 гаруй төрөлд 250 гаруй уран бүтээлч нэр дэвшээд байгаа бөгөөд регги, сока, дэнсхолл, калипсо, R&B болон госпел зэрэг төрлүүдээр шагналыг гардуулах юм. Энэ жил Карибын тэнгисийн хөгжмийн төрөл зүйлийг илүү өргөн хүрээнд хамруулах зорилгоор шинэ ангилалуудыг нэмж оруулжээ.
