АНУ-ын Вашингтон хотод болсон шүүх хурлын үеэр Сингапур улсын иргэн, 22 настай Малон Лам зохион байгуулалттай гэмт бүлэглэлийн (RICO) хуйвалдаанд оролцсон гэм буруугаа хүлээн зөвшөөрлөө. Прокуроруудын мэдээлснээр уг гэмт хэргийн сүлжээ нь нийт 245 сая гаруй ам.долларын криптовалютыг хулгайлж, угаасан хэрэгт холбогдоод буй юм.
Цахим залилангаас тансаг амьдрал руу
Прокуроруудын тайлбарласнаар Лам нь цахим орчинд “Anne Hathaway”, “$$$”, “King Greavy” зэрэг нэрсийг ашиглаж, бай болох хүмүүсийг сонгох болон бусад оролцогчдын үүргийг зохицуулдаг байжээ. Тус бүлэглэл 2023 оны аравдугаар сараас 2025 оны тавдугаар сар хүртэл Калифорни, Коннектикут, Нью-Йорк, Флорида болон хилийн чанадад үйл ажиллагаа явуулсан байна. Тэд криптовалют эзэмшигчдийн хэтэвчийг хоослохын тулд нийгмийн инженерчлэл ашиглах, зарим тохиолдолд гэрт нь хууль бусаар нэвтрэх зэрэг аргуудыг хэрэглэдэг байжээ.
Эдгээр хулгайн орлогоор тансаг амьдралын хэв маягийг санхүүжүүлдэг байсныг прокурорууд онцолсон юм. Тухайлбал, гишүүд нэг шөнийн дотор шөнийн клубт 500,000 хүртэлх ам.доллар үрэх, 100,000-аас 500,000 гаруй ам.долларын үнэтэй цагнууд худалдан авах, үдэшлэг дээр тансаг цүнхнүүд бэлэглэх зэргээр зарцуулдаг байв. Мөн Майами, Лос-Анжелес, Хэмптонст байр түрээсэлж, 3.8 сая хүртэлх ам.долларын үнэтэй супер машинууд болон хувийн нисэх онгоц хөлслөн хэрэглэж байжээ.
Нэг хохирогчоос 4,100 биткойн алдагдсан хэрэг
Уг ажиллагааны цар хүрээ 2024 онд Вашингтон хотын нэгэн иргэнээс 4,100 гаруй биткойн хулгайлагдсан хэрэгт Лам болон Жандиел Серрано нарыг буруутгаснаар олон нийтэд ил болсон юм. Тухайн үед буюу 2024 оны наймдугаар сарын 18-нд уг зооснуудын үнэлгээ 230 сая гаруй ам.доллароор хэмжигдэж байжээ. Тэд Google болон Gemini платформын тусламжийн ажилтан болж жүжиглэн, хохирогчийн компьютерт зайнаас хандах эрх авснаар биткойныг удирддаг хувийн түлхүүрийг олж авсан байна.
Прокурорууд Ламыг 2025 оны есдүгээр сард Майами дахь түрээсийн байшингаас нь баривчилжээ. АНУ-ын дүүргийн шүүгч Коллин Коллар-Котелли түүний дараагийн сонсголыг 12 дугаар сарын 8-нд товлосон байна. Энэ нь ял оноох сонсгол биш бөгөөд уг сүлжээнд холбогдох бусад этгээдүүдийн хэргийг үргэлжлүүлэн шалгаж байгаа ажээ.
