Криптовалютын төвлөрсөн арилжааны CoinEx бирж есөн жилийн турш ажилласны эцэст үйл ажиллагаагаа бүрэн зогсоохоо мэдэгдлээ. Тус платформ 9 дүгээр сарын 15-нд мэдэгдэл хийхдээ орлого буурсан болон хууль эрх зүйн зохицуулалтыг дагаж мөрдөх зардал өссөн нь цаашид үйл ажиллагаа явуулах боломжгүй болгосон гэж тайлбарласан байна.
CoinEx-ийн зүгээс үйл ажиллагаагаа шат дараатайгаар хумихаар төлөвлөж байгаа бөгөөд 9 дүгээр сарын 29-нд спот арилжааг зогсоож, улмаар 12 дугаар сарын 22-нд хөрөнгө татах боломжийг бүрэн хаахаар болжээ. Одоогийн байдлаар шинээр хэрэглэгч бүртгэхээ больсон бөгөөд фьючерсийн зах зээлийг зөвхөн позицоо хаах горимд шилжүүлж, маржин, зээл, Earn болон стейкинг зэрэг бүтээгдэхүүнүүдийг үе шаттай хааж эхэлсэн байна.
Үүсгэн байгуулагч Хайпо Янг (Haipo Yang) хэлэхдээ, CoinEx зах зээлийн тэргүүлэгч биржүүдийн нэг болж чадаагүй тул олж буй бага хэмжээний орлоготой харьцуулахад аюулгүй байдал, зохицуулалтын үүрэг хариуцлагын асар өндөр эрсдэлийг үүрэх нь оновчтой шийдвэр биш болсныг дурджээ. Түүнчлэн тус компани 2023 онд Нью-Йорк хотын ерөнхий прокурор Летитиа Жеймсийн гаргасан гомдлыг шийдвэрлэхийн тулд 4,691 хөрөнгө оруулагчид 1.1 сая гаруй ам.доллар буцаан олгож, 600 мянга гаруй ам.долларын торгууль төлөн АНУ-ын зах зээлээс гарч байсан түүхтэй юм.
Дунд түвшний биржүүдэд тулгарч буй хүндрэл
Зохицуулалтын дарамт болон хязгаарлагдмал цар хүрээнээс үүдэлтэй ийм асуудал салбарын бусад дунд түвшний тоглогчдод ч ажиглагдаж байна. Тухайлбал, 11 гаруй жил ажилласан дериватив арилжааны BitMEX бирж 9 дүгээр сарын 23-нд үйлчилгээгээ зогсоохоор болсон бол AscendEX бирж 7 дугаар сарын 1-нээс үйл ажиллагаагаа зогсоосон билээ. AscendEX-ийн хувьд дахин хөрөнгөжүүлэх хэлцэл нь бүтэлгүйтсэний дараа албан ёсны төлбөрийн чадваргүйдлийн процесс эхлүүлэх боломжит хувилбарт бэлтгэж буйгаа өмнө нь мэдэгдсэн юм.
Зах зээлийн төвлөрөл нэмэгдсээр байна
CoinMarketCap-ийн мэдээллээр 8 дугаар сард хяналтад байдаг төвлөрсөн 11 том биржийн нийт спот болон дериватив арилжааны хэмжээ өмнөх сараас 12.3 хувиар өсөж, 4.23 их наяд ам.долларт хүрсэн байна. Гэвч зах зээлийн идэвхжил эргэн сэргэсэн ч арилжааны дийлэнх нь цөөн хэдэн том тоглогчдод төвлөрчээ.
Binance, OKX, MEXC, Bybit болон Gate биржүүд нийт арилжааны 88 орчим хувийг дангаараа бүрдүүлсэн байна. Ялангуяа Binance 8 дугаар сард дангаараа 1.83 их наяд ам.долларын арилжаа хийж, зах зээлийн 43.3 хувийг эзэлсэн нь хоёрдугаарт орсон OKX биржийн 681.3 тэрбум ам.доллароос даруй гурав дахин их дүн юм.
