АНУ-ын крипто салбарын хөдөлмөрийн зах зээл дэх нөлөөллийг судалсан "Crypto at Work" шинэ тайлан гарчээ. Үндэсний Криптовалютын Холбоо (NCA) болон Pragmatic Policy Group-ийн хамтран гаргасан энэхүү судалгаа нь тус салбарын эдийн засагт оруулж буй бодит хувь нэмрийг анх удаа цогцоор нь харуулсан байна.
Судалгааны үр дүнгээс үзэхэд, крипто салбарт шууд ажиллаж буй хүний тоо 34,000 байгаа нь бусад томоохон салбаруудтай харьцуулахад харьцангуй цөөн юм. Жишээлбэл, цай, кофе үйлдвэрлэлийн салбарт 28,400, тамхины үйлдвэрлэлд 10,600 хүн ажилладаг байна. Хэдийгээр ажиллах хүчний тоо бага ч, энэ салбар 2026 онд АНУ-ын эдийн засагт 55 тэрбум долларын хувь нэмэр оруулах тооцоо гарчээ.
Тус салбарын ажлын байрны онцлог нь өндөр цалин хөлсөөр тодорхойлогдож байна. Крипто салбарт ажиллагсдын жилийн дундаж цалин 133,000 доллар байгаа нь АНУ-ын үндэсний дундаж цалин болох 64,000 доллараас хоёр дахин илүү бөгөөд технологи болон үйлдвэрлэлийн салбарын дундаж цалингаас ч дээгүүр үзүүлэлт юм.
Эдийн засгийн үр нөлөө
Pragmatic Policy Group-ийн ашигласан эдийн засгийн загварчлалаар крипто салбарын нэг ажлын байр нь бусад салбарт дахин зургаан ажлын байрыг дэмждэг байна. Үүнд ханган нийлүүлэгчид болон крипто салбарын ажилтнуудын зарцуулж буй мөнгөөр дамжин үүсэж буй ажлын байрууд багтаж байгаа бөгөөд үүнийг нэмж тооцвол нийт 232,000 ажлын байрыг энэ салбар дэмжиж байна.
Гэсэн хэдий ч крипто салбарын ажлын байрны тархалт нь газарзүйн хувьд жигд бус байна. Калифорни, Нью-Йорк, Техас муж улсууд нийт ажлын байрны 60 хувийг бүрдүүлж байгаа бол, Колорадо болон Хойд Дакота муж улсууд криптод ээлтэй татварын бодлого болон олборлолтын үйл ажиллагаагаараа шинээр гарч ирж буй төвүүд хэмээн тайланд дурджээ.
Судалгааны баг крипто салбарын ажлын байрны нарийвчилсан профайл одоогоор бүрэн бүрэлдээгүй байгаа тул санхүүгийн үйл ажиллагааг уламжлалт санхүүгийн салбараас илүүтэйгээр технологийн салбарын бүтцээр загварчилсан гэдгээ тэмдэглэжээ.
