Их Британийн нийслэл Лондон хот аюулгүй байдлын хувьд хүндрэлтэй гэх цахим орчин дахь яриа хөөрөөнд Лондон хотын захирагч болон цагдаагийн дарга нар тайлбар хийлээ. Тэд хотын гудамжинд үйлдэгдэх гэмт хэргийн гаралт буурсанд үндэслэн аялагчдыг аюулгүй байдалд санаа зовох шаардлагагүй гэж үзэж байна.
Лондон хотын Метрополитан цагдаагийн газраас гаргасан мэдээллээр, зургаадугаар сар хүртэлх нэг жилийн хугацаанд гар утасны хулгай, халаасны хулгай, орон сууцны хулгай болон тээврийн хэрэгсэлтэй холбоотой гэмт хэргүүдийг багтаасан "хөршийн гэмт хэрэг" 14 хувиар буурчээ.
Энэхүү үзүүлэлт нь Парламентын ордон, Сохо болон Лестер талбай зэрэг жуулчдын хамгийн ихээр зорчдог газрууд байрладаг Вестминстер дүүрэгт ч мөн хамааралтай байна. Албаныхан энэхүү тоон мэдээллийг ашиглан Лондон хотыг хууль дүрэмгүй газар гэж дүрсэлсэн сөрөг хандлага бүхий мэдээллүүдийг няцаахыг зорьж байгаа юм.
