Америк хөлбөмбөгийн NFL-ийн “Даллас Ковбойс” баг “Балтимор Рэйвенс”-ийн эсрэг тоглолтод 34-31 харьцаатай ялагдал хүлээсний дараа тус багийн домогт тоглогч, Алдрын танхимын гишүүн Майкл Ирвин ESPN сувгаар дамжуулан багийнхаа довтолгооны тоглолтод маш их сэтгэл дундуур байгаагаа мэдэгдлээ.
Тоглолтын төгсгөлд буюу цаг дуусахад 28 секунд үлдээд байх үед “Ковбойс” өрсөлдөгчийнхөө 2 ярдын зайнаас довтлох боломжтой болсон юм. Гэвч Жорж Пиккенс рүү дамжуулсан бөмбөг амжилтгүй болж, хуурамч эхлэлтийн алдаа гарган, улмаар гурав дахь довтолгоон дээр холбогч Дак Прескотт бөмбөгийг талбайн гадна шидсэнээр хожлын тачдаун хийх боломжоо алдаж, оноо тэнцүүлэх цохилтоор сэтгэл ханахад хүрчээ. Энэ үед Пиккенст урд талын туг орчимд боломж байх шиг харагдсан юм.
Майкл Ирвин энэ тухайд: “Би довтолгооны хэсэгт илүү их сэтгэл дундуур байна. Тоглолтыг удаан эхлүүлж, эцэст нь ийм муу дуусгана гэдэг хамгийн муу зүйл. Жимми Жонсоноос хойш ‘Ковбойс’ тоглолтын төгсгөлийг маш муу хийдэг болсон. Тоглолтын хувь заяа шийдэгдэх гурав дахь довтолгоон дээр Жорж Пиккенсийг яаж харахгүй өнгөрөөж чадав аа?” хэмээн бухимджээ. Мөн тэрбээр тамирчид бэлтгэл, ярилцлагын үеэр олон зүйл төлөвлөдөг атал шийдвэрлэх мөчид ойлголцол алдсаныг ойлгоход бэрх байна гэдгийг онцолсон байна.
Дак Прескотт энэ тоглолтод 40 дамжуулалтаас 25-ыг нь амжилттай болгож, 276 ярд ахиулан 1 тачдаун хийснээс гадна дөрвөн удаа бөмбөгтэй гүйж 19 ярд авсан үзүүлэлттэй дуусгав. Ирвин багийнхаа хамгаалалтыг “Балтимор”-ын аюултай довтолгоог хаалтын шугам дээр зогсоож, тоглолтыг ойрхон барихад тусалсан хэмээн сайшаасан ч довтолгоо эхнээсээ оноо авч тоглолтыг удирдах ёстойг санууллаа.
Ийнхүү энэ улирлын амжилт нь 1-2 болсон “Даллас Ковбойс” дараагийн 4-р долоо хоногт “Хьюстон Тексанс” багийн талбайд зочлон тоглох юм.
