Мексик-Америкийн домогт Intocable хамтлаг есдүгээр сарын 15-ны орой Мехико хотын хамгийн чухал нийтийн талбай болох Сокало талбайд (Zócalo) болох Тусгаар тогтнолын баярын үеэр тоглохоор болжээ. Энэхүү шийдвэрийг Мексикийн Ерөнхийлөгч Клаудиа Шейнбаум есдүгээр сарын 8-ны мягмар гарагт сошиал хуудсаараа дамжуулан зарласан байна.
Энэ нь тус улсын ерөнхийлөгчийн хувьд Үндэсний ордноос уламжлалт "Grito de Dolores" буюу тусгаар тогтнолын уриалгыг хоёр дахь удаагаа айлтгах үйл явдал юм. Уг уриалга нь 1810 оны есдүгээр сарын 16-ны өглөө санваартан Мигель Идалго Испанийн эрхшээлийн эсрэг бослого гаргахыг уриалж байсан түүхэн үйл явдлыг дурсдаг уламжлалтай билээ.
Intocable хамтлагийн тоглолтын өмнө Засгийн газраас зохион байгуулдаг México Canta авьяастны уралдааны хоёр дахь улирлын ялагчид нээлт хийн дуулах юм. Соёлын яамны мэдээлснээр уг уралдааны шувтаргын шат есдүгээр сарын 13-ны ням гарагт Үндэсний аудиторид болно.
Сокало нь Бээжингийн Тяньаньмэний талбайн дараа орох дэлхийн хоёр дахь том нийтийн талбай бөгөөд өмнө нь Пол Маккартни, Жастин Бибер, Шакира, Розалиа, Висенте Фернандес зэрэг олон алдартнууд тоглолтоо хүргэж байв. Энэхүү талбайд болсон үнэ төлбөргүй тоглолтуудын үзэгчдийн дээд амжилтыг энэ оны гуравдугаар сарын 1-нд 400,000 үзэгч цуглуулсан Колумбын супер од Шакира эзэмшдэг байна.
Intocable хамтлаг нь энэ зун RIAA-гийн Латин хөтөлбөрийн хүрээнд хамгийн олон "Diamond" гэрчилгээ авсан Латин хамтлаг болсон бөгөөд нийт үзүүлэлтээрээ зөвхөн Bad Bunny-гийн ард хоёрдугаарт бичигдэж буй юм. Түүнчлэн тэд саяхан Холливудын Алдрын гудамжинд өөрсдийн одоо байршуулжээ.
