Москвагийн бирж (MOEX) 9 дүгээр сарын 22-ны өдөр таван томоохон криптовалютын үнэ ханшийг дагадаг хугацаагүй фьючерсийн шинэ гэрээнүүдийг арилжаанд нэвтрүүлнэ. Шинэ бүтээгдэхүүнд Bitcoin, Ethereum, Solana, XRP болон Tron зэрэг криптовалютын индекстэй холбогдсон BTCUSDF, ETHUSDF, SOLUSDF, XRPUSDF, TRXUSDF гэрээнүүд багтаж байна.
Эдгээр гэрээ нь спот арилжаанаас ялгаатай бөгөөд хөрөнгө оруулагчид тухайн криптовалютуудыг бодитоор өөртөө эзэмшихгүйгээр үнийн хөдөлгөөнд оролцох нөхцөлийг бүрдүүлдэг. Гэрээний ханш нь ам.доллароор илэрхийлэгдсэн MOEX-ийн крипто индекст тулгуурлах ба үүсэх ашиг, алдагдлыг ОХУ-ын рублиэр тооцож шилжүүлэх юм. Мөн уг бүтээгдэхүүний арилжаа зөвхөн шаардлага хангасан хөрөнгө оруулагчдад нээлттэй байх аж.
Гэрээний бүтэц ба барьцааны шаардлага
Энэхүү хугацаагүй фьючерс нь нэг өдрийн хугацаатай байх ба өдөр бүр автоматаар дараагийн арилжааны үе рүү шилждэг бүтэцтэй тул хөрөнгө оруулагчид хугацаа нь дууссан гэрээг гараар солих шаардлагагүй. Биржийн зүгээс санхүүжилтийн K1 параметрийг 0%, K2 параметрийг 0.35% байхаар тогтоожээ.
Арилжаанд оролцохын тулд хөрөнгө оруулагчид эхний ээлжийн барьцаа (margin) байршуулах ёстой. Үүнд хамгийн бага барьцааны хэмжээг:
* Bitcoin-д 22%
* Tron-д 30%
* Ethereum-д 35%
* Solana-д 38%
* XRP-д 43% байхаар тогтоосон нь XRP гэрээнд хамгийн өндөр барьцаа шаардагдаж байна.
Үүнээс гадна гэрээ бүрд LK1 болон LK2 төвлөрлийн хязгаар тогтоосон бөгөөд энэ нь XRPUSDF-ийн хувьд 961-ээс 4,807 гэрээ, ETHUSDF-ийн хувьд 124,490-ээс 622,450 гэрээний хооронд хэлбэлзэж байна. Харин харилцагчдад санал болгох эцсийн нөхцөлийг брокерууд бие даан шийдвэрлэнэ.
600 тэрбум рублийн эргэлт
Москвагийн бирж өмнө нь тодорхой хугацаатай крипто фьючерсийг санал болгож байсан туршлагатай. Биржийн 9 дүгээр сарын 16-ны мэдээллээр 72,000 гаруй шаардлага хангасан хөрөнгө оруулагч эдгээр бүтээгдэхүүнийг арилжаалсан бөгөөд нийт эргэлт нь 600 тэрбум рублиэс давжээ.
