АНУ-ын Нью-Йорк муж томоохон хэмжээний дата төвүүдийн үйл ажиллагаанд хязгаарлалт тогтоосон анхны муж боллоо. Тус мужийн захирагч Кэти Хокул 7-р сарын 14-ний өдөр захирамж гаргаж, 50 мегаватт буюу түүнээс дээш цахилгаан эрчим хүч шаарддаг шинэ болон өргөтгөл хийж буй дата төвүүдийн зөвшөөрлийн хүсэлтийг түр хугацаанд зогсоох шийдвэр гаргажээ.
Шинэ хязгаарлалтын зорилго
Энэхүү түр зогсолт нь албаны хүмүүс дата төвүүдийн цахилгаан эрчим хүчний эрэлт, усны хангамж, агаарын чанар, дуу чимээ болон хүрээлэн буй орчны нөлөөллийг судлах хугацаанд үргэлжлэх юм. Гэхдээ захирамж гарахаас өмнө бүрэн мэдүүлэгдсэн өргөдлүүд болон орон нутгийн зөвшөөрөлтэй төслүүдэд энэ хязгаарлалт хамаарахгүй.
Биткойн олборлогчдын төлөвлөгөөнд нөлөөлөх нь
Сүүлийн жилүүдэд Биткойн олборлогч компаниуд өөрсдийн эзэмшлийн том талбай, цахилгаан станцын холболт бүхий байгууламжуудаа хиймэл оюун ухаан (AI) болон үүлэн тооцооллын үйлчилгээ эрхлэх зориулалтаар ашиглахаар төлөвлөж байсан. Энэ нь биткойны үнийн хэлбэлзлээс хамааралтай байдлаа бууруулах гэсэн оролдлого юм. CoinShares Valkyrie-ийн шинжээч Мэттью Киммелийн таамаглаж буйгаар, 2026 оны эцэс гэхэд AI нь олборлогч компаниудын орлогын 80 орчим хувийг бүрдүүлэх боломжтой байна.
Голдман Сакс (Goldman Sachs) компанийн тооцооллоор, хиймэл оюун ухааны дэд бүтцэд чиглэсэн хөрөнгө оруулалт 2026 онд 765 тэрбум ам.долларт хүрч, 2031 он гэхэд 1.6 их наяд ам.доллар болон өсөх төлөвтэй байна. Биткойн олборлогчид эрчим хүчний их нөөцтэй, дэд бүтэц бэлэн байгууламжуудаараа дамжуулан энэхүү өсөн нэмэгдэж буй зах зээлд өөрийн байр суурийг эзлэхээр зорьж байгаа ч Нью-Йорк мужийн энэхүү шинэ зохицуулалт нь тэдний хувьд томоохон сорилт болж байна.
