Америкийн алдартай фолк-поп урсгалын дуучин Ноа Кахан-ы энэ амралтын өдрүүдэд Нью-Йорк хотын "Citi Field" цэнгэлдэх хүрээлэнд хийхээр төлөвлөсөн тоглолт цаг агаарын таагүй байдлаас болж цуцлагдлаа.
Цэнгэлдэх хүрээлэнгийн зүгээс мэдээлснээр, тус бүс нутагт аадар бороо орох, цахилгаан цахилах, хүчтэй салхи шуурах, үер буух эрсдэл өндөр байсан тул үзэгчид болон оролцогчдын аюулгүй байдлыг нэн тэргүүнд тавьж ийм шийдвэр гаргасан байна. Дуучин Ноа Кахан өөрийн Instagram хуудсаараа дамжуулан шүтэн бишрэгчиддээ хандаж, тоглолтыг зохион байгуулах бүхий л боломжийг эрэлхийлсэн ч бүтэлгүйтсэндээ харамсаж байгаагаа илэрхийлжээ.
Одоогоор цуцлагдсан тоглолтыг өөр өдөр шилжүүлэх эсэх талаар албан ёсны мэдээлэл гараагүй байна. Түүний "Great Divide" аялан тоглолтын хүрээнд "Citi Field"-д хоёр өдөр дараалан тоглолт хийхээр төлөвлөсөн байсан бөгөөд хоёр дахь тоглолт хуваарийн дагуу үргэлжлэхээр хүлээгдэж байна.
Мөн тус хотын "Forest Hills" цэнгэлдэх хүрээлэнд болох байсан Zeds Dead хамтлагийн тоглолт ч цаг агаарын нөхцөл байдлын улмаас хойшлогджээ. Уг тоглолтыг ирэх наймдугаар сарын 14-нд зохион байгуулахаар товлосон бөгөөд урьд нь худалдаж авсан тасалбар хүчин төгөлдөр хэвээр байх юм.
Ноа Каханы хувьд энэ удаагийн аялан тоглолт нь түүний дөрөв дэх студийн цомог болох 'The Great Divide'-ийг сурталчлах зорилготой юм. Тэрээр удахгүй Австрали, Шинэ Зеланд, Их Британи, Ирланд болон Европын орнуудад аялан тоглолтоо үргэлжлүүлэхээр төлөвлөж байна.
