Ойрх Дорнодын бүс нутагт ОХУ-ын үзүүлэх нөлөөлөл Сирийн Ерөнхийлөгч асан Башар аль-Ассадын дэглэм 2024 онд нуран унасны дараа огцом суларна гэж таамаглаж байсан хүлээлтийг Орос улс няцааж байна. Хэдийгээр нөхцөл байдал өөрчлөгдсөн ч Москвагийн тус бүс нутгийн улс төр дэх үүрэг оролцоо эдүгээ «хоёрдогч гүрэн» хэмээх статус руу шилжин хадгалагдаж үлдлээ.
Өмнө нь буюу 2015 оноос эхлэн Орос улс Сирийн иргэний дайнд хөндлөнгөөс оролцож, тухайн үеийн Ерөнхийлөгч Башар аль-Ассадыг Иран болон түүний бүс нутгийн итгэмжлэгдсэн хүчнүүдтэй холбоотон болж дэмжиж байсан юм. Энэхүү цэргийн ажиллагааны хүрээнд Москва дайнд нэрвэгдсэн Сири улсын нутаг дэвсгэрт 100 орчим цэргийн байгууламж ажиллуулж байв.
Гэвч нөхцөл байдал өөрчлөгдөж, исламын шашинт босогчдод хяналтаа алдсан Ассад Москва руу зугтахаас өөр аргагүйд хүрсэн юм. Исламист босогчид Сирийн ихэнх газар нутгийг хяналтдаа авсан хэдий ч Оросын Ойрх Дорнод дахь геополитикийн оролцоо бүрмөсөн алга болоогүй бөгөөд шинэ нөхцөл байдалд дасан зохицож байна.
