ОХУ-ын Төрийн Дум "Дижитал валют ба дижитал эрхийн тухай" хуулийн төслийг хоёр болон гурав дахь хэлэлцүүлгээр эцэслэн баталлаа. Энэхүү хууль нь тус улсад криптовалютын эргэлтийг анх удаа албан ёсоор зохицуулах хүрээг тогтоож байгаа юм. Одоо уг хуулийн төсөл Холбооны Зөвлөлөөр дамжин Ерөнхийлөгч Владимир Путинд очиж, гарын үсэг зурснаар хүчин төгөлдөр болно.
Хуулийн гол агуулга
Шинэ хуулиар криптовалютыг бараа, үйлчилгээний төлбөрт ашиглахыг зөвшөөрөөгүй хэвээр байна. ОХУ-ын нутаг дэвсгэрт рубль нь цорын ганц хууль ёсны төлбөрийн хэрэгсэл хэвээр үлдэж, крипто ашиглан төлбөр хийх болон түүнийг сурталчлах хориг үргэлжилнэ. Гэсэн хэдий ч уг хууль нь криптог өмч хөрөнгө гэж хүлээн зөвшөөрч, түүнийг зохицуулах байгууллагуудыг лицензжүүлэх, хөрөнгө оруулагчдад тодорхой хязгаарын хүрээнд худалдан авах боломжийг олгож байна.
2026 оны есдүгээр сарын 1-нээс эхлэн ОХУ-ын Төв банк бирж, брокер, хадгаламжийн байгууллага зэрэг таван төрлийн оролцогчийг тусгай бүртгэлээр лицензжүүлэх юм. Эдгээр байгууллага нь дор хаяж 15 сая рублийн дүрмийн сантай байх шаардлагатай бөгөөд өөрийгөө зохицуулах байгууллагад нэгдэх ёстой.
Олон улсын худалдаа ба хориг арга хэмжээ
Энэхүү хуулийн хамгийн чухал хэсэг нь криптовалютыг гадаад худалдааны төлбөр тооцоонд ашиглахыг зөвшөөрсөн явдал юм. Ингэснээр барууны орнуудын хориг арга хэмжээнд өртсөн ам.доллар болон еврогийн банкны системээс гадуурх гүйлгээг хийх боломж бүрдэж байна. Өмнө нь сүүдрийн зах зээлд явагдаж байсан энэ төрлийн үйл ажиллагааг ОХУ-ын Төв банкны хяналт дор албан ёсны дэд бүтэц болгон хувиргаж байна.
Төрийн Думын Санхүүгийн зах зээлийн хорооны дарга Анатолий Аксаковын хэлснээр, хууль нь салбарын саналыг дээд зэргээр тусгаж, тус улсад криптовалют үйл ажиллагаа явуулах эрх зүйн нөхцөлийг бүрдүүлэхэд чиглэжээ.
