ОХУ-ын Төрийн дум криптовалютын зах зээлийг зохицуулах, ялангуяа тус салбар дахь залилангийн эсрэг тэмцэх шинэ хуулийн төслийг авч хэлэлцэж байна. Төрийн думын Санхүүгийн зах зээлийн хорооны дарга Анатолий Аксаковын мэдээлснээр, уг хуулийн төсөл нь улс доторх криптовалютын хууль бус ашиглалтыг хязгаарлахад чиглэж байгаа аж.
Хууль эрх зүйн шинэ орчин
Оросын ТАСС агентлагийн мэдээлснээр, хууль тогтоогчид уг төслийг хоёр болон гурав дахь хэлэлцүүлгээр энэ долоо хоногт батлахаар төлөвлөж байна. Шинэ хуулиар криптовалютыг олон улсын гүйлгээнд ашиглах боломжийг хууль ёсны хүрээнд бүрдүүлэх асуудлыг ч мөн тусгажээ. Хэдийгээр ОХУ-д криптовалютыг төлбөрийн хэрэгсэл болгон ашиглахыг 2022 оноос хойш хориглосон ч олон улсын тооцоонд ашиглах тал дээр эрх баригчид нээлттэй байр суурьтай байна.
ОХУ-ын Ерөнхийлөгч Владимир Путин өмнө нь криптовалют олборлолтыг дэмжиж буйгаа илэрхийлж, тус улс эрчим хүчний илүүдэл болон хүйтэн уур амьсгалын улмаас энэ салбарт тодорхой давуу талтай гэдгийг онцолж байсан юм. Өнгөрсөн онд тэрээр тодорхой зөвшөөрөл бүхий хуулийн этгээдүүдэд криптовалют олборлохыг зөвшөөрсөн хуульд гарын үсэг зурсан байна. Одоогоор гаднын үйл ажиллагаа эрхлэгчдэд тус улсад бизнес эрхлэхийг хориглоод байгаа юм.
Хөрөнгө оруулагчдад тавих шаардлага
Хууль тогтоогчдын зүгээс криптовалютын хөрөнгө оруулагчдыг тодорхой шалгалт өгөхийг шаардахаар төлөвлөж байгаа бөгөөд худалдан авч болох хөрөнгийн хэмжээнд хязгаарлалт тогтоох юм байна. ОХУ-ын томоохон банкууд шинэ зохицуулалт батлагдсаны дараа криптовалют арилжааны үйлчилгээ нэвтрүүлэхээр төлөвлөж байна.
Ерөнхийлөгч Путин 2024 оны 12 дугаар сард Москвад болсон форумын үеэр криптовалютын талаар байр сууриа илэрхийлэхдээ: "Жишээлбэл, Биткойныг хэн хориглож чадах юм бэ? Хэн ч чадахгүй. Мөн бусад цахим төлбөрийн хэрэгслийг хэн хориглох юм бэ? Хэн ч чадахгүй, учир нь эдгээр нь шинэ технологи юм" хэмээн онцолжээ.
