UFC-ийн тулаанч Пауло Коста тус холбоо тамирчдад тэгш бус хандаж, шийдвэр гаргахдаа давхар стандарт баримталж байна хэмээн үзэж буйгаа илэрхийллээ.
Энэхүү маргаан нь тулаанч Крис Сайборг эмэгтэйчүүдийн жингийн нөхцөл байдлын талаар бичсэний дараа эхэлсэн юм. Тухайлбал, UFC Парис арга хэмжээний үеэр Валентина Шевченко бэртлийн улмаас нэг жил хүртэл хугацаанд тулалдах боломжгүй болж магадгүй нь тодорхой болсон тул түүний аваргын бүсийг хурааж, эзэнгүй болсон бүсийн төлөө Наталья Силва болон Ван Цун нарыг UFC 332 дээр тулалдуулахаар товлосон байна. Сайборг үүнийг шүүмжилж, хэрэв Шевченкогийн бүсийг хурааж байгаа бол удаан хугацаанд тулалдаагүй Кайла Харрисонд ч мөн адил шаардлага тавих ёстой гэж байр сууриа илэрхийлжээ.
Үүний дараа Пауло Коста тус маргаанд нэгдэж, UFC тогтсон дүрэм журамгүй, үргэлж давхар стандарт ашигладаг хэмээн бичсэн байна. Мөн тэрээр хүнд жинд гарч тулалдаад ялагдсан Алекс Перейра яагаад хагас хүнд жингийн чансаанд хэвээр байгаа, түүнчлэн хүнд жинд ганц ч ялалт аваагүй атлаа яагаад уг жингийн 4-р байрт эрэмбэлэгдэж байгааг асуужээ.
Түүнчлэн Коста хагас хүнд жингийн нөхцөл байдалд өөрийн саналыг гаргасан байна. Карлос Улберг бэртлийн улмаас 2027 оны хоёрдугаар хагас хүртэл тулалдахгүй байж болзошгүй байгаа тул Коста тус жинд түр аваргын бүс бий болгохыг санал болгож, өөрөө тулалдахад бэлэн гэдгээ илэрхийлжээ. Гэвч UFC түр аваргын бүс гаргахаас татгалзсан байна.
