Пуэрто-Рикогийн алдартай уран бүтээлч Рау Алехандро (Rauw Alejandro) Нью-Йорк хотын Квинс дэх «Forest Hills» цэнгэлдэх хүрээлэнд өөрийн карьер, өнгөрсөн ба одоо, ирээдүйн замналаа харуулсан гурван бүлэгт тоглолтоо толилууллаа.
Энэхүү «Red Bull Chapters» нэртэй төсөл нь эхэндээ нэг өдөр буюу 9 дүгээр сарын 5-нд болохоор төлөвлөгдөж байсан ч тасалбар нь маш хурдан дууссан тул маргааш нь буюу 9 дүгээр сарын 6-ны өдрийг нэмж зохион байгуулахаар болсон байна. Энэ нь тамирчид болон экстрим спортыг дэмждэгээрээ танигдсан «Red Bull» брэндийн хувьд хөгжмийн уран бүтээлчид зориулан хэрэгжүүлж буй анхны «Chapters» төсөл болжээ.
Тоглолтын өмнөх өдөр Рау Алехандро Billboard сэтгүүлд өгсөн ярилцлагадаа уг хамтын ажиллагаа нь урлаг, хөгжмийг спортын ертөнцтэй нэгтгэх зорилготой байсныг онцолсон юм. Тоглолтын хөтөлбөр нь «Inspiration», «Momentum», «Legacy» гэсэн гурван бүлгээс бүрдсэн бөгөөд уран бүтээлчийн өсөж хөгжсөн үе шатуудыг харуулжээ.
«Inspiration» буюу эхний бүлэгт түүний хөгжмийн үндэс суурь, Пуэрто-Рикогийн соёл, салса болон реггетон урсгалын нөлөөг харуулсан байна. Түүний өвөө болон эцэг нь хөгжимчин байсан нь уран бүтээлд нь гүн туссан тухайгаа тэрээр хуваалцсан бөгөөд тоглолтоо Rvssian, Ayra Starr нартай хамтарсан «Santa» дуугаараа эхлүүлсэн юм.
