Америкийн алдарт реппер, Migos хамтлагийн гишүүн асан Оффсет (жинхэнэ нэр нь Киари Сефус) өнгөрсөн жил Лос-Анжелес хотын нэгэн каннабис худалдаалах дэлгүүрт гарсан маргаантай холбоотойгоор шүүхийн шийдвэр сонсжээ.
Калифорни мужийн шүүхээс түүнийг нэг жилийн хугацаатай тэнсэн харгалзах шийдвэрийг долдугаар сарын 15-ны өдөр гаргасан байна. Энэхүү шийдвэрийн хүрээнд Оффсет олон нийтийн ажил хийх, уур бухимдлаа удирдах сургалтад хамрагдах зэрэг шаардлагуудыг биелүүлэх ёстой. Хэрэв тэрээр эдгээр нөхцөлийг бүрэн биелүүлбэл түүний эсрэг үүсгэсэн эрүүгийн хэргийг хэрэгсэхгүй болгож, бүртгэлээс нь устгах юм.
Хэрэг явдал 2025 оны гуравдугаар сард MedMen нэртэй дэлгүүрт болсон байна. Репперийг дэлгүүрт орохдоо иргэний үнэмлэхээ үзүүлэх шаардлага тавьсан хамгаалагч Жим Леобардо Санчезын нүүр лүү цохисон хэмээн буруутгажээ. Оффсет өөрт нь тулгасан энэхүү хэргийг хүлээн зөвшөөрөөгүй бөгөөд гэм буруугүй гэдгээ мэдэгдсээр ирсэн юм.
Шүүхийн шийдвэрийн дагуу тэрээр тухайн дэлгүүрийн ойр орчимд очихгүй байх, хүчирхийллийн шинжтэй үйлдэл гаргахгүй байх, мөн хохирогч Санчезад санхүүгийн нөхөн төлбөр төлөх үүрэг хүлээжээ. Хэрэв тэрээр энэ хугацаанд ямар нэгэн зөрчил гаргавал хэргийг дахин сэргээх боломжтой юм. Оффсет энэ оны арваннэгдүгээр сард шүүхэд тайлангаа танилцуулахаар товлогдоод байна.
