Хөрөнгө оруулалтын ертөнцийн нөлөө бүхий эрхэм, Bridgewater Associates компанийг үүсгэн байгуулагч Рэй Далио биткойны талаарх байр сууриа дахин илэрхийллээ. Тэрээр "Diary of a CEO" подкастад оролцох үеэрээ биткойн нь хэвлэх боломжгүй мөнгөний нэг төрөл мөн боловч хөрөнгө оруулалтын хувьд алтыг илүүд үздэг гэдгээ онцолсон байна.
Далио одоогоор өөрийн хөрөнгө оруулалтын багцын ердөө 1 хувийг л биткойнд зориулсан гэдгээ хүлээн зөвшөөрчээ. Тэрээр биткойныг технологийн дэвшил, тухайлбал квант тооцоолол болон засгийн газрын зохицуулалт, татварын бодлогод өртөх эрсдэлтэй гэж үзэж байна. Түүний хэлснээр, засгийн газрууд биткойныг хязгаарлах эрх мэдэлтэй бөгөөд төв банкууд гүйлгээний нууцлал, хяналтын асуудлаас шалтгаалан биткойныг их хэмжээгээр эзэмшихийг хүсэхгүй байгаа аж.
Алт vs Биткойн
Рэй Далио өнгөрсөн жилүүдэд биткойныг хэт хэлбэлзэлтэй хэмээн шүүмжилж ирсэн ч эцэст нь өөрийн багцдаа багахан хэмжээгээр оруулснаа зарласан юм. Гэсэн хэдий ч тэрээр "Би биткойноос илүү алт барихыг илүүд үздэг" гэж шууд утгаар нь илэрхийлжээ. Түүний үзэж буйгаар алт нь хөрөнгө оруулалтын илүү тогтвортой сонголт хэвээр байна.
Хэдийгээр Далио болгоомжтой хандаж байгаа ч биткойныг хүлээн зөвшөөрөх байдал уламжлалт хөрөнгө оруулагчид болон Уолл-стритийн томоохон тоглогчдын дунд нэмэгдсээр байна. Тухайлбал, дэлхийн хамгийн том хөрөнгө оруулалтын менежер BlackRock-ийн гүйцэтгэх захирал Ларри Финк биткойныг "олон улсын хөрөнгө" болон "алтыг дижитал хэлбэрт шилжүүлсэн хувилбар" хэмээн тодорхойлж байсан юм.
