Их Британийн дуучин, жүжигчин бөгөөд загвар өмсөгч Сьюки Уотерхаус өөрийн шинэ цомгийн “Loveland” аялан тоглолтоороо ирэх 12-р сард Австрали тивд дөрвөн тоглолт хийхээр зарлалаа. Энэ нь түүний шинэ цомгоо дэмжих хүрээнд тус улсад зохион байгуулж буй анхны тоглолтууд юм.
Түүний аялан тоглолт 12-р сарын 8-нд Сиднейн Дуурийн театрын өмнөх талбайд эхэлж, улмаар 12-р сарын 9-нд Брисбэн, 12-р сарын 11-нд Аделаида, 12-р сарын 12-нд Мельбурн хотуудад үргэлжлэх хуваарьтай байна. Тоглолтын ерөнхий тасалбар 9-р сарын 24-ний өдөр худалдаанд гарна.
Өмнө нь “Daisy Jones & the Six” цувралын жүжигчин, загвар өмсөгчөөр ажиллаж байсан тэрбээр сүүлийн жилүүдэд поп хөгжмийн ертөнцөд хүч түрэн орж ирсэн билээ. Түүний 2017 онд цацаж байсан “Good Looking” дуу нь таван жилийн дараа буюу 2022 онд TikTok сүлжээнд хүчтэй тарснаар Billboard-ийн Hot Rock & Alternative Songs жагсаалтын 14-р байранд хүрч, RIAA-аас цагаан алтан (platinum) гэрчилгээ авсан юм.
Дэлхий даяар 1.75 тэрбум гаруй сонсолт цуглуулсан тэрбээр Coachella, Lollapalooza зэрэг томоохон наадмуудад оролцож, Тейлор Свифт болон Лауфи нарын тоглолтыг нээж байсан туршлагатай. Мөн тэрбээр ирэх жил уран бүтээлч Sombr-ын Их Британид хийх арена аялан тоглолтод хамтран оролцохоор төлөвлөгджээ.
