Грэммийн шагналт алдартай дуучин Сэм Смит хувийн амьдралынхаа шинэ хуудсыг нээж байгаагаа олон нийтэд зарлав. Тэрээр The New York Times сонинд өгсөн ярилцлагадаа загвар зохион бүтээгч Кристиан Коуантай сүй тавьснаа баталжээ.
Энэхүү баярт мэдээ нь түүний удахгүй гарах тав дахь студийн цомог болох "Hazel Eyes"-ийн шинэ сингл "Oh Mother" дууг гаргаснаас хэдхэн хоногийн дараа олон нийтэд ил болсон юм. "Hazel Eyes" цомог нь наймдугаар сарын 21-нд Capitol Records-оор дамжуулан худалдаанд гарна. Дуучин Смит цомгийн нэрээ сүйт залуу Кристиан Коуаны нүдний өнгөнөөс санаа авч өгсөн гэдгээ дурджээ.
Цомогт багтсан "Everlasting Love" дууны хувьд хосуудын анхны болзооны өмнөх өдөр бичигдэж эхэлсэн бөгөөд тэдний харилцаа цэцэглэн хөгжих явцад бүрэн дуусгавар болсон байна. Смит энэхүү бүтээлээ уламжлалт поп хөгжмийн тогтолцооноос гадуур, цөөн тооны уран бүтээлчидтэй хамтран, илүү чөлөөтэй, хувийн шинж чанартай болгон бүтээснээ онцоллоо.
Дуучин Смит өөрийн бүтээлч үйл явцын талаар ярихдаа: "Би бүх төрлийн мэдрэмжийг байнга мэдэрдэг. Хамгийн аз жаргалтай мөчүүддээ ч би их гуниглаж чаддаг" хэмээн сэтгэл хөдлөлийн зөрчилдөөнтэй байдлыг цомогтоо зориуд шингээснээ хуваалцжээ. Мөн тэрээр өнөөгийн ертөнцөд ЛГБТК+ эрхүүд сорилттой тулгарч байгаа энэ цаг үед хайрын дуу дуулах нь өөрөө нэг төрлийн "радикал" үйлдэл гэдгийг онцолсон байна.
Сэм Смит нь өмнө нь "Stay With Me" болон "Unholy" зэрэг дэлхий дахинд алдаршсан олон хит дуугаараа дамжуулан Billboard-ын чартад амжилттай байр суурь эзэлж байсан уран бүтээлч билээ.
