Францын баруун өмнөд хэсэгт гарсан ойн түймэр урьд өмнө байгаагүй хүчтэй болж, улмаар аянга цахилгаан бүхий үүлэн систем үүсгэсэн талаар албаныхан мэдээллээ. Уг түймрийн утааны багана нь аадар борооны үүл болон хувирч, газар луу аянга буулгаснаар анхны түймрээс гадна шинээр гал түймэр дэгдээхэд хүргэжээ.
Францын албаны хүмүүсийн тайлбарласнаар, энэхүү түймэр нь зөвхөн цаг агаарын нөлөөгөөр тархахаа больж, харин ч өөрөө цаг агаарын нөхцөл байдлыг тодорхойлж эхэлсэн байна. Түймрийн улмаас үүссэн аянгат үүл нь галын дөлийг хүссэн зүгтээ чиглүүлэх чадалтай, хүчтэй бөгөөд тогтворгүй салхийг бий болгожээ.
Энэхүү ховор үзэгдлийг pyrocumulonimbus буюу pyroCb хэмээн нэрлэдэг бөгөөд Европ тивд ийм үзэгдэл тохиолдох нь тун ховор юм. Түймрийн улмаас үүссэн энэхүү аянга цахилгаантай нүсэр үүл нь нөхцөл байдлыг улам хүндрүүлж, гал түймэр олон чиглэлд тархах аюулыг нэмэгдүүлж байна.
