Крипто ертөнцөд хувийн нууц түлхүүрээ (private key) бусдад алдахгүй байх нь хөрөнгөө бүрэн хамгаалж буй хэрэг гэж олон жил ярьж ирсэн. Гэвч энэхүү дүрмийг дагасан ч зоос хулгайд алдагдах эрсдэл байдгийг сүүлийн үйл явдлууд харуулж байна.
Тухайлбал, 9 дүгээр сарын 6-нд Liquid сүлжээний нөөцөөс 4000 орчим биткойн зөвшөөрөл авч гарчээ. Хачирхалтай нь, уг гүйлгээг баталгаажуулсан хувийн түлхүүрүүд хулгайд алдагдаагүй байв. Liquid нь биткойноор баталгаажсан L-BTC хэмээх токеноор гүйлгээг илүү хурдан бөгөөд нууцлалтай хийх боломж олгодог тусдаа блокчэйн юм. Хэрэглэгчид биткойноо дундын нөөцөд байршуулан L-BTC авдаг бөгөөд токеноо буцааж арилжаалахад нөөцөөс харгалзах биткойн нь гардаг системтэй.
Системийн алдаа ба халдлага
TRM Labs-ийн хийсэн шинжилгээнээс үзвэл, халдагчид программ хангамжийн цоорхойг ашиглан ямар ч биткойн байршуулалгүйгээр L-BTC үүсгэж, улмаар түүнийгээ жинхэнэ зоосоор сольж авсан байна. Ингэснээр гүйлгээг баталгаажуулах үүрэгтэй операторууд буруу мэдээлэлд үндэслэн шилжүүлгийг зөвшөөрчээ. Өөрөөр хэлбэл, хэд хэдэн хүн дансны буруу үлдэгдлийг харан зөвшөөрөл өгч байгаатай адил нөхцөл үүссэн байна.
Даатгал бүрэн хамгаалж чадах уу?
Ийм төрлийн алдагдлын дараа хамгийн чухал асуулт нь хохирлыг хэн төлөх вэ гэдэгт оршдог. Крипто даатгал тусалж болох ч энэ нь тийм ч хурдан бөгөөд хялбар шийдэл биш байж магадгүй юм. Тухайн компани даатгалтай байлаа ч энэ нь хэрэглэгч бүрийн хохирлыг бүрэн барагдуулах баталгаа болохгүй байх магадлалтай. Мөн даатгалын төлбөр нь алдагдсан зоосыг бүрэн нөхөхөд хүрэлцэхгүй байж болох талтай.
Тухайлбал, крипто бирж Coinbase өөрийн даатгалын талаар хийсэн мэдэгдэлдээ, гэмт хэргийн даатгал нь хадгалагдаж буй дижитал активын зөвхөн "тодорхой хэсгийг" кибер халдлага болон хулгайгаас хамгаалдаг болохыг тайлбарлажээ. Нийт хохирол нь даатгалын нөхөн төлбөрөөс давсан тохиолдолд хэрэглэгчид хохирол хүлээж үлдэж болзошгүйг тус компани анхааруулсан байна. Мөн нэвтрэх нэр, нууц үгээ алдсанаас болж данснаас нь мөнгө алдагдсан хувь хүний хохирол даатгалд хамрагдахгүй ажээ.
АНУ-д банк дампуурахад FDIC хадгаламжийг хамгаалдаг шиг бүрэн төсөөлөлтэй байх нь крипто салбарт төөрөгдөл үүсгэж болзошгүй бөгөөд хамгаалалтын бодит нөхцөлтэй сайн танилцах шаардлагатайг дээрх жишээнүүд харуулж байна.
