АНУ-д зохион байгуулагдаж буй хөлбөмбөгийн ДАШТ-ий шигшээ тоглолтын үеэр хөлбөмбөгийн түүхэнд анх удаа завсарлагын шоу зохион байгуулагдлаа. Энэхүү арга хэмжээ нь хөлбөмбөгийн ертөнцөд шинэлэг бөгөөд сонирхолтой үзэгдэл болсон юм. Уг шоунд алдартай уран бүтээлчид болох Мадонна, BTS, Шакира болон Жастин Бибер нар оролцож, мөн "Muppets" хүүхэлдэйн киноны баатрууд болон "Ted Lasso" цувралын жүжигчид үзэгчдэд гэнэтийн бэлэг барилаа.
Шоуны үеэр поп хөгжмийн хатан хаан Мадонна хөлбөмбөгийн домогт тоглогчид болох Роналдиньо болон Р9 нартай хамт ATV мотоциклоор гарч ирсэн нь олны анхаарлыг ихэд татав. Тэрээр өөрийн 2000 оны хит "Music" дуугаа дуулсан юм. Үүний дараа дэлхийд алдартай Өмнөд Солонгосын хөвгүүдийн хамтлаг BTS өөрсдийн "Dynamite" дуугаар үзэгчдийг доргиолоо.
Шоуны бас нэгэн хэсэгт "Ted Lasso" цувралын одод болох Жейсон Судейкис болон Брендон Хант нар дуучин Жастин Биберийг тайзнаа урьсан юм. Гэвч Биберийн дуулсан "Everything Hallelujah" дууны сонголт үзэгчдийн дунд холимог сэтгэгдэл төрүүлж, зарим үзэгчдийн зүгээс шүүмжлэлтэй тулгарсан байна. Эцэст нь дуучин Шакира өөрийн хамтрагч Burna Boy-ийн хамт "Dai Dai" дуугаа толилуулжээ.
Нийтдээ 6 хүрэхгүй минут үргэлжилсэн энэхүү шоуг үзэгчид болон хөлбөмбөгийн тайлбарлагчид интернэт орчинд идэвхтэй хэлэлцэж байна. Олон сар бэлтгэсэн шоу нь зар сурталчилгааны завсарлагаас ч богино хугацаанд үргэлжилсэн нь хүмүүсийн анхаарлыг илүүтэй татсан юм. АНУ-д 1994 оноос хойш анх удаа зохион байгуулагдаж буй энэхүү ДАШТ нь Америкийн спортын энтертайнмент хэв маягийг улам бүр шингээж байгаа нь ийнхүү харагдлаа.
