АНУ-ын Чикаго хотын Грант паркт зохион байгуулагдаж буй Lollapalooza 2026 хөгжмийн наадмын гурав дахь өдөр байгалийн гамшигт үзэгдлийн улмаас хүндрэлтэй тулгарлаа. Шөнөжин үргэлжилсэн хүчтэй аадар борооны улмаас наадмын талбай усанд автаж, зохион байгуулагчид хуваарьт өөрчлөлт оруулахаас өөр аргагүй болов.
Наадмын албан ёсны мэдээллээр, тус өдөр 12:00 цагт эхлэх ёстой байсан үйл ажиллагаа 15:00 цаг хүртэл хойшилсон байна. Энэхүү саатлын улмаас тухайн цагт товлогдсон байсан ихэнх тоглолтуудыг цуцалжээ. Үүний зэрэгцээ, тайзны талбайнууд усанд автсан тул цэвэрлэгээний ажлыг эрчимтэй хийж гүйцэтгэсэн байна.
Хуваарийн өөрчлөлтөөс үүдэн уран бүтээлчдийн тоглолтын хугацаа ч мөн багассан байна. Тухайлбал, K-pop хамтлаг CORTIS-ийн тоглолт хойшлогдож, 50 минутын оронд 40 минут үргэлжилсэн бол Английн рок хамтлаг Wolf Alice-ийн нэг цагийн тоглолт ердөө 30 минут болж богиноссон гэж Variety мэдээллээ.
Наадмын гурав дахь өдрийн хөтөлбөрт Olivia Dean, JENNIE нарын тэргүүтэй уран бүтээлчид оролцох байсан юм. Харин наадмын дөрөв дэх буюу сүүлийн өдөр Tate McRae, The xx, aespa зэрэг уран бүтээлчид тайзнаа гарахаар төлөвлөгдөөд байна.
