АНУ-ын Алабама мужаас гаралтай кантри дуучин Элла Лэнгли хөгжмийн ертөнцөд шинэ түүх бүтээхэд тун ойрхон ирээд байна. Түүний хит дуу болох "Choosin’ Texas" нь эмэгтэй уран бүтээлчийн эрэгтэй оролцогчгүйгээр гаргасан, баярын өдрүүдийн бус дуунуудаас хамгийн удаан хугацаанд Billboard-ын Hot 100 жагсаалтыг тэргүүлсэн түүхэн амжилтыг тогтоох боломжтой байна.
Долдугаар сарын 25-ны өдрийн байдлаар тус дуу нь Мэрайя Кэригийн "We Belong Together" болон Уитни Хьюстоны "I Will Always Love You" дуунуудын тогтоосон дээд амжилттай эн зэрэгцээд байна. Элла Лэнгли энэхүү домогт уран бүтээлчдийг ардаа орхиж, шинэ рекорд тогтоосон эсэх нь ирэх даваа гарагт тодорхой болох юм.
"Choosin’ Texas" дуу нь анх хоёрдугаар сард жагсаалтыг тэргүүлж эхэлсэн бөгөөд түүнээс хойш Лэнгли поп болон кантри хөгжмийн чартуудад өөрийн дуу болон "Dandelion" цомгоороо олон амжилтыг дараалан тогтоосоор байна. Энэхүү дууг Лэнгли нь Миранда Ламберт, Люк Дик болон Жойбет Тейлор нартай хамтран бичжээ.
Дууны үүсэл гарлын тухайд Лэнгли Billboard-д өгсөн ярилцлагадаа Миранда Ламберттай хамт бичих үедээ сонссон сонирхолтой түүхийг хуваалцсан юм. Миранда багадаа тэжээвэр кангурутай байсан бөгөөд нэг удаа кангуругаа машиндаа суулгаж яваад цагдаад зогсоогдсон түүхээ ярьжээ. Тэрээр кангуругийнхаа ачаар торгуулиас мултарч чадсан бөгөөд тухайн үед түүний машинд Техасын улсын дугаар байсан нь дууны санааг төрүүлсэн байна. Ингээд 45 минутын хугацаанд тэд энэхүү дууг бичиж дуусгажээ.
