Их Британи болон Ирландын хөгжмийн салбарын нэр хүндтэй Mercury шагналын 2026 оны нэр дэвшигчдийн жагсаалтыг зарлалаа. Энэхүү шагнал нь жил бүр тухайн оны шилдэг хөгжмийн цомгуудыг төрөл бүрийн жанраар нь үнэлэн олгодог уламжлалтай юм.
Энэ жилийн 12 цомгоос бүрдсэн жагсаалтад RAYE, Olivia Dean болон домогт хөгжимчин Пол Маккартни нар багтжээ. Алдарт The Beatles хамтлагийн гишүүн асан Пол Маккартни өөрийн 20 дахь бие даасан цомог болох «The Boys of Dungeon Lane»-ээрээ анх удаа энэхүү нэр хүндтэй шагналын нэр дэвшигчдийн эгнээнд орж байна.
Жагсаалтад мөн RAYE-ийн «THIS MUSIC MAY CONTAIN HOPE», Olivia Dean-ийн «The Art of Loving» зэрэг чартыг тэргүүлсэн цомгууд багтсан бол бусад нэр дэвшигчдийн дунд Dave, Florence + The Machine, Dove Ellis, JADE, Knats, Kojey Radical, Nia Archives, Suede болон War Child-ийн «HELP(2)» цомог багтжээ.
Шагнал гардуулах ёслол 2026 оны 10-р сарын 22-нд Ньюкасл хотын Utilita Arena-д болох юм. Тус ёслолын үеэр нэр дэвшсэн уран бүтээлчид тайзан дээр тоглолт хийх бөгөөд хөгжим сонирхогчид шагналын албан ёсны цахим хуудсаар дамжуулан тасалбар худалдан авах боломжтой.
Энэ жилийн нэр дэвшигчдийг BBC 6 Music болон Radio 2-ын хөгжмийн албаны дарга Жефф Смитээр ахлуулсан хараат бус шүүгчдийн бүрэлдэхүүн сонгосон байна. Шалгаруулалтад 2025 оны 8-р сарын 30-наас 2026 оны 7-р сарын 17-ны хооронд худалдаанд гарсан цомгууд хамрагдсан юм. Өмнөх жилүүдийн ялагчдын дунд Sam Fender, English Teacher, Ezra Collective, Little Simz болон Arlo Parks нар тодорч байв.
