Дэлхийн рок хөгжмийн ертөнцөд томоохон байр суурь эзэлдэг “Download” фестиваль энэ жил онцгой үйл явдлаар дүүрэн өнгөрлөө. 90-ээд оны сүүл, 2000-аад оны эхээр ну-метал урсгалыг дэлхий дахинд түгээсэн домогт Limp Bizkit хамтлаг фестивалийн гол тайзан дээр гарч, олон мянган шүтэн бишрэгчдээ байлдан дагууллаа.
Энэхүү тоглолт нь хамтлагийн хувьд зүгээр нэг үзүүлбэр биш, харин 23 жилийн өмнөх түүхээ засварласан үйл явдал болсон юм. Учир нь 2003 онд анх удаа зохион байгуулагдсан “Download” фестивалийн гол хөтөлбөрт Limp Bizkit хамтлаг багтаж байсан ч, тодорхой шалтгааны улмаас тоглолтоо цуцалж, оронд нь Audioslave хамтлаг тайзан дээр гарч байсан түүхтэй. Тухайн үед энэ нь шүтэн бишрэгчдийн хувьд том урам хугаралт болж байв.
Тэгвэл энэ удаа Фред Дёрст тэргүүтэй хамтлагийнхан бүхнээ зориулж, “Break Stuff”, “Rollin'” зэрэг хит дуунуудаараа фестивалийн уур амьсгалыг оргилд нь хүргэсэн байна. Олон жилийн туршлагатай хамтлагийн хувьд тайзан дээрх энерги, хөгжимчдийн ур чадвар нь огтхон ч буураагүйг энэ удаагийн тоглолт баталлаа.
Limp Bizkit бол 1994 онд байгуулагдсан, рэп болон метал хөгжмийн өвөрмөц хослолоороо алдаршсан Америкийн хамтлаг юм. Тэднийг 2000-аад оны эхэн үеийн рок хөгжмийн “алтан үеийн” төлөөлөл гэж үздэг бөгөөд өнөөг хүртэл дэлхий даяар сая сая шүтэн бишрэгчтэй хэвээр байна. 23 жилийн өмнөх бүтэлгүйтлээ ийнхүү “Download” фестивалийн түүхэн дэх хамгийн дурсамжтай тоглолтуудын нэгээр сольж чадсан нь тэдний хувьд том ялалт боллоо.
