АНУ-ын Калифорни мужийн Сан-Хосе хотын Garden City сүмийн ахлах пастор, 47 настай Жастин Баззард олон жилийн өмнө орхисон спортын мөрөөдлөө биелүүлэхээр San Jose City College (SJCC) Jaguars багийн бүрэлдэхүүнд багтжээ.
Тэрбээр өдөр тутмын пасторын ажил, ном зохиол бичих, гэр бүлийн амьдралаа хослуулан коллежийн талбайд эргэн гарч байна. Баззард цахим орчноос 60 гаруй настай эрэгтэй америк хөлбөмбөг тоглож буй бичлэгийг үзсэнийхээ дараа өөрийн мөрөөдөл дуусаагүй эсэхийг эргэцүүлж, улмаар тус коллежийн дасгалжуулагчтай холбогджээ. Ингэснээр тэр 7-р сарын сүүлээр багт багтан, удахгүй хүрэх насаа бэлгэдэн 48 дугаартай өмсгөлийг авсан байна.
Спортын замнал ба түүний үзэл баримтлал
Баззард өмнө нь Вашингтон мужийн Whitworth коллежид суралцаж байсан ч гэмтэл болон цаг агаарын нөхцөл байдлаас шалтгаалан Калифорнийн Westmont коллеж руу шилжин 2000 онд төгсжээ. Тэрбээр оюутан ахуй цагтаа тоглож байсан defensive end байрлалдаа эргэн гарч байгаа юм.
Тэрбээр эхнэр Тейлор болон спорт сонирхдог гурван хүүгийн хамт амьдардаг бөгөөд "Date Your Wife", "Why Cities Matter" зэрэг номуудыг бичсэн зохиолч юм. Баззард эрчүүдийг эрсдэлээс айлгүй, амьдралдаа томоор сэтгэхийг уриалсан өөрийн философийг дэмждэг байна.
Коллежийн түвшний америк хөлбөмбөгт ахмад тоглогчид тоглож байсан тохиолдол өмнө нь гарч байсан бөгөөд тухайлбал Алан Мур, Том Томпсон нар 61 насандаа, Майк Флинт 59 насандаа доод лигүүдэд тоглож байжээ. Харин Баззардын хувьд 2026 оны улирлын тоглолтуудад талбайд гарах боломжийг олж авах нь түүний дараагийн том зорилго болж байна.
