Америкийн алдарт реппер, бизнесмэн 50 Cent саяхан GQ сэтгүүлд өгсөн ярилцлагадаа өөрийн оролцсон кино болон цувралуудын талаар дэлгэрэнгүй ярьжээ. Тэр дундаа түүний «Power» цувралд бүтээсэн Канан Старкийн дүр болон тус төслийн эргэн тойронд өрнөсөн үйл явдлууд олны анхаарлыг татаж байна.
50 Cent тус цувралын гүйцэтгэх продюсер, хөгжмийн найруулагч болон гол дүрүүдийн нэгээр ажиллаж байсан ч цалингаа хасуулан ажиллаж байснаа илчилсэн юм. Тэрээр цувралын эхэн үед нэг ангид 17,000 долларын цалин авдаг байжээ. Репперийн хэлснээр, тэрээр цувралын хөгжмийг хариуцаж, сурталчилгааны ажилд идэвхтэй оролцдог байсан ч түүний нэр цувралтай салшгүй холбоотой байсан нь зохиолч Кортни Кемп Агбо болон гол дүрийн жүжигчин Омари Хардвик нартай харилцахад хүндрэл үүсгэж байв.
"Хүмүүс анх удаа амжилтад хүрэхээрээ тэр бүхэн зөвхөн өөрийнх нь байхыг хүсдэг. Энэ бол 50 Cent-ийн цуврал гэж олон нийт хүлээж авч байсан нь зохиолч болон жүжигчин Омари Хардвикийн хувьд эвгүй байдал үүсгэсэн" хэмээн тэрээр тайлбарлажээ. 50 Cent-ийн үзэж буйгаар, цувралын гуравдугаар улирал хүртэл түүний оролцоогүйгээр «Good Morning America» нэвтрүүлэгт тус цувралыг сурталчлах боломжгүй байсан аж.
Үүнээс гадна, 50 Cent удахгүй нээлтээ хийх «Street Fighter» кинонд Балрогийн дүрийг бүтээхээр төлөвлөж байгаа бөгөөд уг киноны дууны найруулгад өөрийн багш Эминем болон талийгаач 2Pac нартай хамтарсан уран бүтээл хийхээр төлөвлөж байгаагаа цухуйлгав.
