Алдарт реппер A$AP Rocky өөрийн дотны найз, нэвтрүүлэгч Жейсон Ли-д өгсөн ярилцлагынхаа үеэр дуучин Рианнатай харилцах харилцаа болон өөрийн өөрчлөлтийн талаар илэн далангүй ярьжээ. Урьд нь дэлхий даяар олон бүсгүйчүүдтэй нэр холбогдож явсан реппер өдгөө Рианнатай бүрэн төвлөрч, хамтдаа амьдарч байгаагаа хуваалцсан байна.
Жейсон Ли репперээс Рианна түүнийг хэрхэн "эмэгтэйчүүдэд дурлагч" залуугаас үнэнч, тогтвортой нэгэн болгон өөрчилсөн талаар асуухад A$AP Rocky: "Тэр бол жинхэнэ хүчирхэг хар арьст эмэгтэй. Намайг амьдралынхаа хамгийн доод цэгт байхад тэр л миний хажууд байсан" хэмээн хариулжээ.
Тэрээр өөрийн аавыг нас барсан үеийг дурсахдаа Рианнагийн дэмжлэг ямар чухал байсныг онцолсон байна. 2012 оны зул сарын баяраар аавынхаа таалал төгссөн тухай мэдээг сонсоод Парис хотод ганцаараа, сэтгэлээр унасан байхад нь Рианна түүнтэй холбогдож, улмаар түүний өрөөнд ирж сэтгэл санааг нь дэмжсэн ажээ. A$AP Rocky-ийн хэлснээр, тэднийг найз нөхдийн харилцаатай байсан эсвэл хосууд байсан ч Рианна үргэлж түүний хажууд байдаг байсан гэнэ.
A$AP Rocky болон Рианна нар 2020 оны аравдугаар сард харилцаагаа албан ёсоор баталгаажуулсан бөгөөд тэд одоо гурван хүүхдийн эцэг эх болоод байна. Жейсон Ли-гийн хийсэн энэхүү ярилцлагын бүрэн хувилбар удахгүй олны хүртээл болох юм.
