Децентрал санхүүгийн (DeFi) томоохон протокол болох Aave-ийн засаглалын хүрээнд шинэ санал дэвшүүлжээ. Уг саналд Aave-ийн үйл ажиллагааг тодорхой сүлжээнүүд дээр зогсоох, мөн зарим хөрөнгийн зах зээлийг татан буулгах асуудлыг хөндсөн байна.
Тодруулбал, Aave нь Sonic, Scroll, zkSync, Metis, Soneium болон Aptos сүлжээнүүд дэх үйл ажиллагаагаа зогсоох төлөвтэй байна. Энэхүү шийдвэр гаргах болсон гол шалтгаан нь эдгээр сүлжээгээр дамжин орж ирж буй орлого маш бага буюу "жижиг мөнгө" гэж тодорхойлогдсонтой холбоотой ажээ. Зарим сүлжээний хувьд хадгаламжийн хэмжээ нь 90 гаруй хувиар буурсан үзүүлэлттэй байна.
Үүнээс гадна уг саналын хүрээнд бусад сүлжээнүүдэд байрлах 5 хөрөнгийн зах зээлийг татан буулгах асуудлыг ч мөн хэлэлцэж байна. Aave нь хэрэглэгчдэд крипто хөрөнгө зээлэх, зээлдүүлэх үйлчилгээ үзүүлдэг томоохон платформ бөгөөд ийнхүү үйл ажиллагаагаа оновчтой болгох алхам хийж байгаа нь тус протоколын эдийн засгийн үр ашгийг нэмэгдүүлэх зорилготой бололтой.
