Технологийн аварга Apple компани хоёр хоногийн дараа Нью-Йорк хотод "Welcome Home" нэртэй шинэ бүтээгдэхүүн танилцуулах арга хэмжээгээ зохион байгуулах гэж байна. Энэхүү эвентээр ухаалаг гэрийн шинэ шийдлүүдийг танилцуулна гэсэн хүлээлт үүсээд буйг Bloomberg агентлагийн сэтгүүлч Марк Гурман мэдээлжээ.
Apple компани 2014 онд HomeKit программ хангамжаа гаргаснаас хойш сүүлийн 10 гаруй жилийн хугацаанд ухаалаг гэрийн салбарт төдийлөн амжилт олж чадаагүй юм. Тухайлбал, Google компани ухаалаг термостат үйлдвэрлэгч Nest Labs-ийг, Amazon компани видео хонхоороо алдартай Ring-ийг худалдан авч зах зээлд байр сууриа бэхжүүлж байх хооронд Apple-ийн 2018 онд гаргасан HomePod ухаалаг спикер амжилтгүй болж байв.
Шинэ төхөөрөмжүүд ба хамтын ажиллагаа
Сэтгүүлч Марк Гурманы таамаглаж буйгаар ирэх мягмар гарагт болох арга хэмжээний үеэр Apple компани хоорондоо нягт холбогдон ажиллах төхөөрөмжүүд бүхий бэлэн экосистемийг дэлгэх төлөвтэй байна. Үүний гол цөм нь HomeView нэртэй ухаалаг гэрийн төв байх аж. Тус төхөөрөмж нь хананд суурилуулдаг болон ширээн дээр тавьдаг хувилбартай, A18 чип болон дуу хоолойгоор удирдах дэвшилтэт функцтэй байна гэж таамаглаж байна.
HomeView нь бие даасан төхөөрөмж байхаас илүүтэй, LG компанитай хамтран хийсэн ухаалаг цоож, хаалганы хонх зэрэг гуравдагч талын дагалдах хэрэгслүүдийг нэгтгэх холбоос болох төлөвтэй байна. Түүнчлэн MacRumors-ийн мэдээлснээр, Apple гэр ахуйн аюулгүй байдлын ADT компанитай хамтран ажиллах тухайгаа зарлаж магадгүй ч энэ нь одоогоор таамаг төдий байгаа юм.
Apple TV болон HomePod-ийн шинэчлэлт
Сүүлийн хоёр жил шинэчлэгдээгүй байгаа Apple TV-д мөн шинэчлэлт хийгдэхээр хүлээгдэж байна. Шинэ загварт илүү дэвшилтэт чип, Siri ашиглахад зориулагдсан суурилуулсан микрофон болон өнгөний шинэ сонголтууд нэмэгдэж болзошгүй гэж Гурман онцолжээ. Албан ёсны худалдаанд гарах өдөр тодорхойгүй байгаа ч шинэчлэгдсэн Apple TV болон шинэ HomePod төхөөрөмжүүд 10-р сарын 30-нд хэрэглэгчдэд хүрч эхэлнэ гэж таамаглаж байна.
