Технологийн томоохон компани болох Apple саяхан зохион байгуулсан “Welcome Home” арга хэмжээнийхээ үеэр ухаалаг дэлгэцийн зах зээлд өрсөлдөх цоо шинэ төхөөрөмж болох Apple HomeView-ийг албан ёсоор танилцуулсан билээ. Тус ухаалаг дэлгэц нь 11-р сарын 13-нд худалдаанд гарахаар товлогдоод байна.
Гэсэн хэдий ч 10-р сарын 15-ны байдлаар Amazon платформ дээр уг төхөөрөмжийн зарим өнгийн загваруудыг Apple-ийн үндсэн үнээс нь хямд буюу 289.99 ам.доллароор урьдчилан захиалах боломжтой болжээ. Энэ нь төхөөрөмжийн албан ёсны 299 ам.долларын үнээс 9.01 ам.доллароор хямдарсан дүн юм. Хямдралтай урьдчилсан захиалгад ягаан (rose pink), мөнгөлөг (silver) болон сансрын саарал (space gray) өнгөнүүд багтаж байгаа бөгөөд уг хямдрал хэр удаан үргэлжлэх нь тодорхойгүй байна.
Үзүүлэлтийн хувьд Apple HomeView нь 7 инчийн Liquid Retina дэлгэцтэй, дотроо Siri AI суурилсан системтэй ирж байна. Мөн орон зайн дуугаралт бүхий Spatial Audio дэмждэг чанга яригчтай бөгөөд хэрэглэгчид үүгээр FaceTime хийх, мессеж бичих, дуудлага хийх зэргээр ашиглах боломжтой. Үүнээс гадна дэлгэцийн үндсэн хэсгийг өөрийн дуртай зураг эсвэл хуанлигаар өөрчлөн тохируулах боломжтой юм.
Түүнчлэн HomeView нь нэг өрхийн зургаа хүртэлх хүнийг таних чадвартай бөгөөд хэрэглэгч бүр өөрт тохирсон хувийн тохиргоо үүсгэн ашиглах боломжийг олгожээ.
