Дэлхийн үүлэн тооцооллын зах зээлд тэргүүлэгч Amazon Web Services (AWS) компанийн төлбөрийн үйл ажиллагаанд техникийн ноцтой доголдол үүссэн байна. Энэхүү алдааны улмаас тус компанийн үйлчилгээг ашигладаг зарим хэрэглэгчдийн сарын төлбөр хэдхэн центээс огцом нэмэгдэж, тэрбум долларын нэхэмжлэл болон хувирчээ.
Технологийн салбарт үйл ажиллагаа явуулдаг AWS нь дэлхий даяар байгууллага, компаниудад үүлэн сервер болон тооцооллын хүчин чадлыг түрээслүүлдэг томоохон үйлчилгээ үзүүлэгч юм. Гэвч тус компанийн төлбөр тооцооны системд гарсан гэнэтийн алдаа нь хэрэглэгчдийг цочролд оруулсан байна.
Одоогоор уг асуудалтай холбоотой дэлгэрэнгүй мэдээлэл болон алдааг хэрхэн шийдвэрлэж байгаа талаарх албан ёсны мэдээлэл хараахан гараагүй байна. Хэрэглэгчдийн хувьд хэдхэн цент төлөх ёстой байсан төлбөр нь ийнхүү тэрбум долларын нэхэмжлэх болж ирсэн нь системийн том алдаа болохыг харуулж байна.
